Maliyyə

Ana səhifə

Maliyyə

Azərbaycanda qeyri-rezident fiziki şəxslərin uzunmüddətli bank əmanətləri son bir ildə 7 dəfə artıb

07 aprel 2009 12:37 (UTC +04:00)

Bakı. Vüqar İsrafilov – APA-Economics. Azərbaycanda fəaliyyət göstərən banklarda yerləşdirilən müddətli əmanət və tələb olunanadək depozitlərin həcmlərində əks istiqamətli dinamika müşahidə olunur. Bu barədə «APA-Economics»ə Azərbaycan Milli Bankından məlumat verilib.
AMB-nin hesablamalarına əsasən, fevral ayının yekunu üzrə hüquqi və fiziki şəxslər tərəfindən açılan tələb olunanadək əmanət və depozitlər ötən ilin müvafiq dövrünə nisbətən 20,2% artıb, müddətli əmanət və depozitlər isə 7,7% azalıb. Bu zaman bankların ümumi depozit portfeli son bir ildə 1,4% artıb və hesabat dövrünün sonuna 3 920,6 mln. manat təşkil edib. Maraqlıdır ki, müştərilərin manatla açdıqları müddətli əmanət və depozitlərin xüsusi çəkisi 45,4%-ə çatıb.
AMB-nin bu gün açıqladığı «Pul icmalında» qeyd olunur ki, müddətli əmanət və depozitlərin strukturunda qısamüddətli əmanət və depozitlərin xüsusi çəkisində azalma, uzunmüddətli əmanət və depozitlərin xüsusi çəkisində isə artım müşahidə olunur. Belə ki, yanvar ayına nisbətən fevralda müddətli əmanətlərin strukturunda 1 ildən 5 ilədək yerləşdirilən əmanətlərin xüsusi çəkisi 15,5 faiz bəndi artaraq 32,3%-ə çatıb.
Fiziki şəxslərin uzunmüddətli əmanətlərinin artımı ötən ilin müvafiq dövrünə nisbətən 25,5% təşkil edib. Martın əvvəlinə rezident fiziki şəxslərin əmanətlərinin həcmi 1 627,8 mln. manata, qeyri-rezident fiziki şəxslərin əmanətləri isə 185,6 mln. manata bərabər olub. Cari ilin fevral ayının sonuna ötən ilin müvafiq dövrü ilə müqayisədə qeyri-rezident fiziki şəxslərin manatla qısamüddətli əmanətləri 58,5% azalıb, uzunmüddətli əmanətləri isə 7 dəfə artıb.

* 07.04.2009-cu il vəziyyətinə 1 ABŞ dollarının rəsmi məzənnəsi 0,8029 manat təşkil edir