Maliyyə

Ana səhifə

Maliyyə

«Azərbaycan Sənaye Bankı» bazara yeni kredit məhsullarını təqdim edib

08 aprel 2009 11:52 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Bankı» ASC müştərilərə «İstehlak kreditləri» adlı yeni kredit məhsullarını təqdim edib. Bankın baş ofisindən «APA-Economics»ə verilən məlumata görə, artıq bankın mövcud və potensial müştəriləri nağd pul krediti, məişət texnikası və mebelin alınması, habelə ev təmiri, təhsil və səyahət üçün kreditlər əldə edə bilərlər. Bundan başqa, yeni avtomobil əldə etmək istəyənlər «ASB»dən əlverişli şərtlərlə kreditə avtomobil götürə bilərlər. Kreditlərin verilməsi prosesinə artıq start verilib.
Qeyd edək ki, ASB tərəfindən istehlak kreditləri illik 24% dərəcəsi ilə 12 ay müddətinə, avtomobil kreditləri isə 20%-lə 18 ay müddətinə verilir.
«İstehlak kreditləri» proqramından başqa, müştərilər bankın digər xidmətlərindən də istifadə edə bilərlər. Belə ki, müştərilər bankda «SMS Banking», «ATM Bankçılıq», «Telefon Bankçılıq», sürətli pulköçürmə xidmətlərindən də istifadə edə və kommunal ödənişləri həyata keçirə bilərlər. Həmçinin, yaranan problemlərin operativ həlli istiqamətində müştərilər üçün «Alo ASB» (493-49-49) xidməti də fəaliyyət göstərir.
Xatırladaq ki, ASB 1996-cı ildə «CIBank» kimi fəaliyyətə başlayıb və 2006-cı ilin sonunda brendini dəyişib. Cari ilin yanvar ayının 1-nə bankın aktivlərinin həcmi 78,029 mln. manat, depozit portfeli 32,560 mln. manat, kredit portfeli 36,101 mln. manat, məcmu kapitalı 16,142 mln. manat, o cümlədən nizamnamə kapitalı 12,8 mln. manat təşkil edib. Hazırda bankın respublika üzrə 7 filialı fəaliyyət göstərir.