Maliyyə

Ana səhifə

Maliyyə

Azərbaycanda bank kassa dövriyyəsində 0,5 mlrd. manatlıq müsbət saldo yaranıb

08 aprel 2009 13:24 (UTC +04:00)

Bakı. Vahab Rzayev – APA-Economics. Cari ilin yanvar-fevral ayları ərzində Azərbaycan bank sistemində kassa dövriyyəsi üzrə mədaxil 3 168 561 400 manat, məxaric isə 2 673 101 500 manat təşkil edib. Azərbaycan Milli Bankından «APA-Economics»ə verilən məlumata əsasən, kassa mədaxili 2008-ci ilin yanvar-fevral ayları ilə müqayisədə 18,9%, məxaric isə 6,8% artıb.
Beləliklə, cari ilin ilk iki ayı ərzində kassa emissiyası baş verməyib. Əksinə olaraq, ehtiyat fonduna pul qoyuluşu (mədaxil və məxaric üzrə əməliyyat kassa qalıqları nəzərə alınmaqla) 499 819 400 manat təşkil edib.
Mədaxil hissəsində əsas yeri xarici valyuta satışından (ümumi mədaxilin 41,95%-i), qeyri-dövlət müəssisələrindən (14,21%) və əhalinin əmanətləri hesabına (10,06%) mədaxil olan vəsaitlər tutub.
Məxaricin əsas hissəsi (23,03%) əmək haqqını nəzərə almadan qeyri-dövlət müəssisələrinin ödənişlərinin payına düşür. Bundan başqa, 16,09%-i əhalinin əmanətləri hesabından, 8,58%-i xarici valyutanın alınmasına məxaric edilib.
Xarici valyuta satışından daxil olan vəsaitlərin illik artımı 77,7%, qeyri-dövlət müəssisələrindən daxil olan vəsaitlərin azalması 10,3% təşkil edib, əhalinin əmanətləri hesabına daxilolmaların həcmi isə 4% azalıb. Eyni zamanda, məxaricin əsas hissələri olan qeyri-dövlət müəssisələrinin ödənişlərinin illik azalması 8,3%, əhalinin əmanətləri hesabından məxaric 49,3% artıb, xarici valyutanın alınmasına məxaric isə 33,4% azalıb.
Bank sistemində gündəlik kassa mədaxili 53 704 000 manat, məxaric isə 45 307 000 manat təşkil edib.
Bank sistemi üzrə kassa dövriyyəsində diqqəti cəlb edən əsas məqamlardan biri mədaxilin məxaricdən artıq olmasıdır. Belə ki, yanvar-fevral ayları ərzində rəsmi qaydada (kassalardan istifadə etməklə) daxil olan pulların həcmi xərclənən vəsaitlərdən 495 459 900 manat çox olub. Eyni zamanda, bankların əməliyyat kassasının qalığı mədaxil üzrə 163 396 800 manat, məxaric üzrə isə 159 337 300 manat təşkil edib. Həmçinin, mədaxil və məxaricin artım templəri də diqqət çəkən amildir. Belə ki, yanvar-fevral ayları ərzində kassa mədaxilinin artım tempi bütövlükdə ötən il üzrə kassa dövriyyəsinin mədaxilinin artımından 0,7 faiz bəndi, məxaricin artımından isə 11,4 faiz bəndi az olub.

* 08.04.2009-cu il vəziyyətinə 1 ABŞ dollarının rəsmi məzənnəsi 0,8031 manat təşkil edir