Maliyyə

Ana səhifə

Maliyyə

«Birlik Bank» son bir ildə aktivlərini 38% artırıb

02 sentyabr 2009 09:43 (UTC +04:00)

Bakı. Elnur Hüseynquluyev – APA-Economics. Azərbaycanın «Birlik Bank» Səhmdar Kommersiya Bankının (SKB) aktivlərinin həcmi 2009-cu ilin iyul ayının 1-nə 50,402 mln. manat təşkil edib ki, bu da ötən ilin iyulun 1-nə olan analoji göstəricidən 38,3% çoxdur.

Bankın baş ofisindən «APA-Economics»ə verilən məlumata görə, hesabat ilində bankın depozit portfeli 2,4% azalaraq 1 mln. manata, kredit portfeli 19,8% artaraq 33,189 mln. manata, o cümlədən, istehlak kreditlərinin həcmi 9,3% artaraq 4,092 mln. manata çatıb. Bu müddət ərzində bankın məcmu kapitalı 24,7% artaraq 19,153 mln. manat, o cümlədən, nizamnamə kapitalı sabit qalaraq 16 mln. manat təşkil edib.

Qeyd edək ki, son bir il ərzində bankın gəlirləri 34,5% artaraq 3,313 mln. manat, xərcləri isə 1,23% artaraq 2,345 mln. manat təşkil edib. Nəticədə, bankın mənfəəti 6,4 dəfə artaraq 0,968 mln. manata çatıb.

Bununla yanaşı, ötən dövr ərzində bankın işçilərinin sayı 27% azalaraq 38 nəfərə, orta aylıq əmək haqqı isə 20% artaraq 120 manat olub.

Xatırladaq ki, təsisçisi 20 yerli fiziki şəxs olan «Birlik Bank» SKB 1993-cü ildən fəaliyyət göstərir və hazırda respublika üzrə 3 filialı var.