Maliyyə

Ana səhifə

Maliyyə

Xarici investorlar bu il Azərbaycan fond bazarından 100 mln. dollar investisiyanı geri çağırıb

13 noyabr 2009 09:04 (UTC +04:00)

Bakı. Nicat Mustafayev – APA-Economics. Bu gün Azərbaycan Qiymətli Kağızlar üzrə Dövlət Komitəsinin (QKDK) sədri Rüfət Aslanlı ölkənin fond bazarının 2009-cu ilin yanvar-sentyabr ayları ərzində inkişaf etməsinə dair mətbuat konfransı keçirib.

«APA-Economics»in məlumatına görə, tədbirdə çıxış edən R.Aslanlı qeyd edib ki, 2009-cu ilin ilk yarısında kəskin səviyyəyə çatan qlobal maliyyə böhranı III rübdə səngiməyə başlayıb və böhranın ən çox təsir etdiyi ABŞ iqtisadiyyatı dirçəlməyə doğru gedir ki, göstəricilər proqnozlardan da artıq olub: «Beynəlxalq Valyuta Fondunun proqnozlarına əsasən, 2009-cu ildə dünya iqtisadiyyatının artım tempi 1,2%, 2010-cu ildə isə 3,1% səviyyəsində olacaq. Halbuki, 2008-ci ildə bu göstərici 2,1% təşkil edib».

Maliyyə böhranının Azərbaycan iqtisadiyyatına təsirindən danışan Komitə sədri həmçinin bildirib ki, böhran Azərbaycana əsasən üç kanal vasitəsilə təsir göstərib: «Bunlardan biri qlobal istehlaka olan tələbatın azalması, digəri qlobal likvidlik çatışmazlığına görə xarici borcalma və borcların qaytarılması amilidir. Üçünücü amil isə sadəcə psixoloji təsirlə bağlı olub».

R.Aslanlı qeyd edib ki, böhran Azərbaycana bir o qədər də təsir etməyib. Belə ki, Azərbaycan 2009-cu ildə iqtisadi böhranın ən az təsir edən ölkələr sırasındadır, həmçinin ölkənin iqtisadi göstəriciləri müsbət olub: «Cari ilin ilk doqquz ayında ötən ilin eyni dövrü ilə müqayisədə ölkədə ÜDM-in artım tempi 6,1% təşkil edib, əhalinin banklardakı əmanətlərinin həcmi 12,2%, kredit qoyuluşu 17,8% artıb, 56 min yeni iş yeri açılıb. Hesabat dövründə investisiya qoyuluşu 5,2 mlrd. manat, inflyasiyanın səviyyəsi isə cəmi 2%-dən bir qədər çox olub. Ölkədə tədiyyə balansında müsbət saldo müşahidə olunub. Belə ki, əgər cari ilin 9 ayında tədiyyə balansının profisiti 8,5 mlrd. ABŞ dolları təşkil edibsə, 2010-cu ildə bunun 12 mlrd. dollar təşkil edəcəyi gözlənilir».

Azərbaycanın maliyyə sahəsində ciddi problemlərin müşahidə olunmadığını bildirən R.Aslanlı qeyd edib ki, hesabat dövründə ölkənin fond bazarında korporativ qiymətli kağızların həcmi 11,2% artaraq 345 mln. manata, dövlət qısamüddəti istiqrazların həcmi isə 61% artaraq 520 mln. manata çatıb.

«Ölkənin maliyyə sektorunda balanslaşdırılmış xarici borc siyasəti həyata keçirilib ki, bu da öz növbəsində böhranın təsirini azaldıb», - deyə Komitə sədri bildirib.

R.Aslanlı onu da qeyd edib ki, cari ildə xarici investorlar Azərbaycanın qiymətli kağızlar bazarından 100 mln. dollar həcmində vəsaiti geri çağırsa da, bu, ölkənin fond bazarına ciddi təsir etməyib.