Maliyyə

Ana səhifə

Maliyyə

«Azərbaycanın Ümumdünya Ticarət Təşkilatına üzvlüyü və bu prosesdə özəl sektorun rolu» mövzusunda dəyirmi masa keçirilib

13 noyabr 2009 09:58 (UTC +04:00)

Bakı. Elnur Hüseynquluyev – APA-Economics. Bu gün Bakıda Azərbaycan İqtisadi İnkişaf və Xarici İşlər nazirliklərinin təşkilatçılığı ilə «Azərbaycanın Ümumdünya Ticarət Təşkilatına (ÜTT) üzvlüyü və bu prosesdə özəl sektorun rolu» mövzusunda dəyirmi masa keçirilib.

«APA-Economics»in məlumatına görə, tədbirdə Azərbaycanın bank və sığorta təşkilatları ilə yanaşı, digər maliyyə qurumlarının nümayəndələri də iştirak edib.

Tədbirdə ABŞ-ı müstəqil eksperti Riçard Self (Richard Self) Azərbaycanın ÜTT-yə üzvlüyü ilə bağlı mövcud imkanlarından danışıb: «Azərbaycanın ÜTT-yə üzv qəbul edilməsi ilə bağlı qurumun mövcud üzvlərinin hamısının razılığı olmalıdır. Əksər ölkələrin Azərbaycanın təklifləri ilə bağlı razılığı var, bəziləri isə bu təkliflərlə razı deyil. Çünki bu təkliflərdə bəzi sahələr mövcuddur ki, o da üzv təşkilatların həssas yeri hesab olunur. Ümumiyyətlə, təqdim olunan təkliflərdə Azərbaycanın da həssas yanaşdığı sahələr var. Lakin bəzi sahələr həssas olsa da, digər sahələr Azərbaycanın inkişafını daha da sürətləndirər. Bunlardan biri telekommunikasiya sahəsi ola bilər».

R.Self daha sonra Azərbaycanın bank və sığorta təşkilatlarının nizamnamə kapitalında xarici kapitala olan məhdudiyyətə də münasibətini bildirib. Onun sözlərinə görə, ÜTT-yə üzv olan ölkələrdə bu cür məhdudiyyətlər tətbiq olunmur. Bu məhdudiyyətlər aradan qaldırılarsa, ölkədə fəaliyyət göstərən yerli sığorta şirkətlərinin sıradan çıxmasına yox, əksinə, sığorta bazarında yeni məhsulların yaranmasına gətirib çıxaracaq. Həmçinin xarici banklar yerli bazara daxil olarkən yerli bankların kapitallarının həcminin artması, eyni zamanda maliyyə məhsullarının artması və maliyyələşmə imkanlarının genişlənməsinə gətirib çıxarır.

Qeyd edək ki, Azərbaycan 1997-ci ildə ÜTT-də müşahidəçi statusu alıb.