Maliyyə

Ana səhifə

Maliyyə

Azərbaycan Qiymətli Kağızlar üzrə Dövlət Komitəsi bir sıra yeni layihə üçün donor təşkilatlar cəlb edəcək

13 noyabr 2009 13:36 (UTC +04:00)

Bakı. Nicat Mustafayev – APA-Economics. Azərbaycan Qiymətli Kağızlar üzrə Dövlət Komitəsi (QKDK) İsveçrə İqtisadi Məsələlər üzrə Dövlət Katibliyi (SECO) ilə birgə keçirəcək bir sıra layihələrə digər donor təşkilatları da cəlb etmək niyyətindədir. «APA-Economics»in məlumatına görə, bunu QKDK-nın sədri Rüfət Aslanlı bildirib.

Onun sözlərinə görə, QKDK tərəfindən SECO-ya institusional, texniki və digər sahələri əhatə edən 5 layihə təqdim olunub ki, layihələrdən ən irisi ictimai məlumatlandırma layihəsidir: «Məhz sözügedən layihəyə biz donor təşkilatlar cəlb etmək niyyətindəyik ki, artıq SECO buna razılıq verib».

Qeyd edək ki, 2001-ci ildən etibarən Azərbaycanla əməkdaşlıq edən SECO ölkədə bir sıra sahənin inkişafı üçün 40 mln. dollar məbləğində maliyyə vəsaiti ayırıb. Hər il İsveçrə Azərbaycana müxtəlif sahələrin inkişafı üçün 6 mln. dollar məbləğində əvəzsiz yardım göstərir. Həmin sahələrə korporativ idarəetmə, lizinq, ilkin ipoteka, dövlət qiymətli kağızlar bazarı, intellektual mülkiyyət hüquqları və su təchizatı daxildir.