Maliyyə

Ana səhifə

Maliyyə

Oqtay Haqverdiyev: “Bu il Azərbaycanın dövlət büdcəsinin 85% icrası gözlənilir”

25 noyabr 2009 11:38 (UTC +04:00)

Bakı. Rəşad Süleymanov – APA-Economics. Bu il Azərbaycanın dövlət büdcəsinin 85% icrası gözlənilir.

«APA-Economics»in məlumatına görə, bunu «Novosti Azərbaycan» agentliyində keçirilmiş mətbuat konfransında iqtisadçı Oqtay Haqverdiyev bildirib.

O.Haqverdiyevin sözlərinə görə, bu, dünyadakı böhranla bağlıdır: “Böhranla əlaqədar hökumət büdcə tərtib olunarkən nəzərdə tutduğu bəzi layihələri təxirə salıb”.

Növbəti il üçün dövlət büdcəsinin bəzi göstəricilərini şərh edən iqtisadçı bildirib ki, ümumilikdə büdcə iqtisadiyyatın vəziyyətini əks etdirmir. Amma bununla belə, hökumət büdcənin tərtibi zamanı 2009-cu ilin nəticələrindən «dərs çıxarıb» və neftin baza qiymətini 45 dollar/1 barel həcmində götürüb. Büdcə xərclərində 3 əsas istiqamət – müdafiə və təhlükəsizlik, sosial və investisiya istiqamətləri əsas götürülüb.

İqtisadi Tədqiqatlar Mərkəzi İdarə Heyətinin sədri Qubad İbadoğlu isə bildirib ki, neftin qiymətindəki azalma və maliyyə böhranının təsirləri büdcədə daha aydın görünür. Büdcənin gəlirlər hissəsində ABƏŞ-dən daxilolmalar 330 mln. manat nəzərdə tutulur ki, bu da gözləniləndən 900 mln. manat azdır. Həmçinin mənfəət vergisi 2 dəfə azalıb, gəlir vergisində də azalma gözlənilir: “Büdcədə qeyri-vergi gəlirləri sırasında dividentlərdən daxilolmalar 98,8% azalıb - cəmi 80 min manat. Bu onunla bağlıdır ki dividentin əsas ödəyicisi olan Beynəlxalq Bank ya maliyyə böhranından zərər çəkib, ya da gələn il bu bankdakı dövlət payı özəlləşdiriləcək. İkinci ehtimal daha böyükdür».

İqtisadçılar onu da bildiriblər ki, gələn il büdcə təşkilatlarının büdcədən kənar gəlirlərinin büdcə kəsirinin örtülməsinə sərf edilməsi universitetlərdə və bu kimi təşkilatlarda işçilərə əməkhaqqından əlavə verilən vəsaitin dayandırılması ilə nəticələnəcək.