Maliyyə

Ana səhifə

Maliyyə

Azərbaycanın «UniLeasing» şirkəti Latviyanın «Parex Leasing and Factoring» şirkətinin səhmlərini ala bilər

25 noyabr 2009 14:28 (UTC +04:00)

Bakı. Elnur Hüseynquluyev - APA-Economics. Azərbaycanın «UniLeasing» şirkəti Latviyanın «Parex Leasing» şirkətinin ölkədəki törəmə müəssisəsi olan «Parex Leasing and Factoring» şirkətinin səhmlərini almaq niyyətindədir.

«UniBank» Səhmdar Kommersiya Bankının (SKB) İdarə Heyətinin sədri Faiq Hüseynovun «APA-Economics»ə verdiyi məlumata görə, «UniLeasing» şirkəti ilə «Parex Leasing and Factoring» şirkəti arasında danışıqlar davam etdirilir. Lakin bu məsələ ilə bağlı hər hansı sənəd və yaxud saziş imzalanmayıb.

“Mən bunu rəsmi məlumat hesab etmirəm. Çünki istənilən təşkilatlar arasında belə bir danışıqlar aparıla bilər. Konkret olaraq bu şirkətlər arasında aparılan danışıqların nəticəsi isə hələlik məlum deyil”, - deyə F.Hüseynov bildirib.

Bankın daha bir əməkdaşı isə «UniLeasing» şirkəti tərəfindən «Parex Leasing and Factoring» şirkətinin problemli aktivlərinin bir hissəsini alacağını qeyd edib.

«Parex Leasing and Factoring» şirkətinin direktor müavini Əfqan Cavadovun sözlərinə görə, bir neçə ay qabaq «UniLeasing» şirkətinə belə bir sənəd təqdim olunub. Lakin hər hansı cavab olmadığı üçün bu danışıqlar dayandırılıb: «Bütün bunlar kommersiya sirri hesab olunur və məncə, mövcud şəraitdə belə bir razılaşma yoxdur».

Xatırladaq ki, təsisçisi «UniBank» Səhmdar Kommersiya Bankı olan «UniLeasing» şirkəti 2004-cü ildən fəaliyyət göstərir. Sari ilin oktyabr ayının 1-nə şirkətin lizinq portfelinin həcmi 32 mln. manat, lizinq müqavilələrinin sayı 859 və nizamnamə kapitalı isə 1,8 mln. manat təşkil edib. Şirkətin fəaliyyət sahəsi respublikanın Şimal-Qərb, Cənub-Şərq, Şimal, Şimal-Şərq və Mərkəzi Aran regionlarını əhatə edir.

«Parex Leasing & Factoring» şirkəti Azərbaycanda 2005-ci ildən fəaliyyət göstərir. Şirkətin Oğuz, Yevlax, Masallı və Naxçıvan nümayəndəlikləri mövcuddur.