Maliyyə

Ana səhifə

Maliyyə

Azərbaycanda dövlət qiymətli kağızlar bazarı 61% azalıb

26 noyabr 2009 07:15 (UTC +04:00)

Bakı. Nicat Mustafayev – APA-Economics. Bu ilin yanvar-oktyabr aylarında Azərbaycanın dövlət qiymətli kağızlar bazarında ötən ilin müvafiq dövrü ilə müqayisədə qeydə alınan əməliyyatların həcmi 61% azalaraq 2 780,786 mln. manat təşkil edib, əqdlərin sayı isə 2,2 dəfə azalıb.

Qiymətli Kağızlar üzrə Dövlət Komitəsindən (QKDK) «APA-Economics»ə verilən məlumata görə, azalmanın əsas səbəbi Azərbaycan Mərkəzi Bankının (AMB) iqtisadiyyatda likvidliyi artırmaq məqsədilə pul siyasətini yumşaltması nəticəsində sterilizasiya aləti olan notların emissiyasını azaltması olub. Belə ki, hesabat dövründə notlar üzrə aparılan əməliyyatların həcmi 81% azalaraq 338,239 mln. manat təşkil edib, qeydə alınan əqdlərin sayı isə 4,8 dəfə azalıb. Notların ilkin yerləşdirilməsi üzrə aparılan əməliyyatların həcmi ötən ilin müvafiq dövrünə nisbətən 80% azalaraq 270,734 mln. manat, təkrar yerləşdirilməsi üzrə isə 84% azalaraq 67,505 mln. manat təşkil edib.

Dövlət istiqrazlarına gəldikdə isə, hesabat dövründə bu alət üzrə qeydə alınan əməliyyatların həcmi 17% artaraq 567,739 mln. manat təşkil edib. O cümlədən, dövlət istiqrazlarının ilkin yerləşdirilməsi üzrə əməliyyatların həcmi 74% artaraq 410,693 mln. manata, təkrar yerləşdirilməsi üzrə isə 1,7 dəfə artaraq 149,046 mln. manata çatıb.

Yanvar-oktyabr aylarında repo və əks-repo üzrə əməliyyatların həcmində də azalma müşahidə olunub. Belə ki, bu qiymətli kağızlar üzrə əməliyyatların həcmi ötən ilin analoji dövrü ilə müqayisədə 63% azalaraq 1 874,808 mln. manat təşkil edib.