Maliyyə

Ana səhifə

Maliyyə

«Muğan Bank» dövriyyəyə uduşlu istiqrazlar buraxıb - MÜSAHİBƏ

«Muğan Bank» dövriyyəyə uduşlu istiqrazlar buraxıb - <font color=red>MÜSAHİBƏ</font>

26 noyabr 2009 08:52 (UTC +04:00)

Bakı. Elnur Hüseynquluyev - APA-Economics. Azərbaycanın «Muğan Bank» Açıq Səhmdar Cəmiyyəti (ASC) oktyabrın sonunda nominal dəyəri 50 manat olan uzunmüddətli istiqrazların emissiyasını həyata keçirib. Belə nominalla qiymətli kağız orta statistik Azərbaycan vətəndaşları üçün tamamilə münasibdir. Beləliklə, ölkəmizin qiymətli kağızlar bazarında yeni, əslində isə çoxlarına tanış olan, lakin tədricən unudulan bir məhsul yaranıb. Təbii ki, bu yeni məhsul geniş əhali təbəqələri arasında böyük marağa səbəb olub. Bununla bağlı, «Muğan Bank» ASC-nin İdarə Heyəti sədrinin müavini Rasim İsmayılov «APA-Economics»ə müsahibə verib və yeni məhsul haqqında ətraflı danışıb.

- Bugünkü gərgin iqtisadi durumda ağıllı yaponlar büdcəyə əlavə vəsait cəlb etmək məqsədilə ümumi dəyəri 400 mlrd. dollar olan dövlət qiymətli kağızlarını emissiya edib. Sizin bu yeni məhsul - adsız istiqrazları emissiya etmək ideyanız eyni şəraitlə əlaqəlidirmi və ya bunu böhran əleyhinə tədbir adlandırmaq olarmı?

- Bildiyimiz kimi, Azərbaycan qlobal maliyyə böhranına inamla tab gətirdi və bu gün ölkə iqtisadiyyatının hər bir sektorunda inkişaf meylləri müşahidə olunur. Azərbaycanın bank sistemi ölkə iqtisadiyyatının tərkib hissəsi olaraq maliyyə böhranı şəraitində özünün müsbət tərəflərini bir daha nümayiş etdirdi. Adsız istiqrazların buraxılması fikri bankın ümumi strategiyasına xas bir addımdır. Belə ki, bizim bank hər zaman bazara yeni məhsulların təklif olunması ilə seçilib. Bankımız tərəfindən aparılan marketinq araşdırmaları bazarda məhz belə bir məhsula müəyyən tələbatın olmasını bir daha sübut etdi və bu, məhsulun bazara çıxarılmasına qərar vermək üçün əsas oldu. Qeyd etmək istərdim ki, ümumi emissiya 200 min ədəddir, emissiyanın həcmi 10 mln. manat təşkil edir və 10 il müddətinə dövriyyəyə buraxılıb. Adsız istiqrazların dövriyyəyə buraxılması «Muğan Bank» üçün vəsaitin cəlb olunması məqsədilə deyil, bankın inkişaf strategiyasının tərkib hissələrindən birinin həyata keçirilməsi üçün nəzərdə tutulub.

- Mümkündürsə, istiqrazlar, onların haradan alınması və alınma şərtləri haqda ətraflı məlumat verərdiniz. Uduş fondu nə qədərdir və ilk tiraj nə zaman keçiriləcək?

- Bizim bankın istiqrazlarını bankın baş ofisindən və ya respublika üzrə fəaliyyət göstərən 27 filialın hər birindən almaq olar. Qeyd etdiyimiz kimi, bu istiqrazlar adsızdır və onu təqdim edən istənilən şəxs nominalı, nominala hesablanmış illik faizi və uduşu tam sərbəst ala bilər. Bankın öhdəliklərinə əsasən, tərəfimizdən 10 il ərzində hər 45 gündən bir ümumilikdə 80 uduş tirajı keçiriləcək. Hər tirajdan sonra növbəti tirajadək ilk 15 gündə alınan hər istiqraza görə 50 qəpik, ikinci 15 günlükdə alınan hər istiqraza görə 1 manat və uduş tirajına yaxınlaşdıqca, yəni üçüncü 15 günlükdə hər bir alınan istiqraza görə 1 manat 50 qəpik komissiya ödəniləcək. İlk tiraj Yeni il ərəfəsində - bu ilin dekabr ayının 15-də ictimaiyyət, KİV nümayəndələri və ən əsası, istiqraz sahiblərinin iştirakı ilə keçiriləcək. Tiraj zamanı 4 ədəd şəffaf lototrondan istifadə olunacaq və 200 min ədəd istiqrazın hər biri uduşda iştirak edəcək. İstiqraz sahibləri hər tiraj barədə xəbərdar olunacaqlar.

Söhbətimizin əvvəlində siz sovet istiqrazları barədə mövzuya toxundunuz. Mən onun əsas fərqlərini izah etmək istərdim. Birincisi, bizim məhsul sovet istiqrazlarına nisbətən daha böyük uduş fonduna malikdir, yəni ildə 9% təşkil edir. Bunu sovet istiqrazlarının 3%-i ilə müqayisə edə bilərsiniz. Bundan əlavə, biz illik 2% gəlirlilik təmin edirik, SSRİ dövründə isə uduşdan əlavə illik heç bir gəlir nəzərdə tutulmayıb.

Başqa sözlə desək, əgər istiqrazlar uduşsuz olarsa belə, o zaman istiqraz sahibi istiqrazı qaytarmaqla, nominalın tam dəyərini, həmçinin nominala hesablanmış illik faizi ala bilər. Belə bir sistem sovet istiqrazlarında mövcud deyildi. Uduş fondu 8,8 mln. manat təşkil edir, yəni emissiyanın 90%-ə qədəri 10 il ərzində uduş fonduna yönələcək.

Yeri gəlmişkən, irsən qalmış bir vərdişi xatırladaq: istiqrazlar yaxınlara, dostlara, ailə şənliklərində yaxşı, qiymətli hədiyyə ola bilər. Bütün bunlarla yanaşı, bu məhsulun mühüm xüsusiyyətlərindən biri də odur ki, istiqraz sahibi istiqrazı bankın hansı satış məntəqəsindən almasından asılı olmayaraq, istənilən zaman bankın baş ofisində və yaxud bankın filiallarından birində istiqrazı təhvil verib pulunu geri ala bilər. Bu istiqrazlar hər zaman nağd pul deməkdir.

- «Siz 10 min manat uddunuz!». Bu sözlər bütün müddət ərzində 160 dəfə səslənəcək?

- 10 min manatı hər 45 gündən bir tiraj zamanı intizarla gözləyənlərdən - «Muğan Bank»ın istiqraz sahiblərindən 2 nəfərin udmaq şansı olacaq. On il ərzində 160 istiqraz sahibi 10 min manat udmaq şansını qazanacaq. Beş şanslı istiqraz sahibi isə 5 min manata sahib ola bilər və istiqrazların qüvvədə olduğu müddət ərzində bu məbləğ 400 istiqraz sahibinin büdcəsini artıra bilər. Bu kampaniyada 2500 manat 10 istiqraz sahibini - bütün dövr ərzində 800 istiqraz sahibini, 1000 manat 18 istiqraz sahibini - bütün dövr ərzində 1440 istiqraz sahibini, 500 manat 29 istiqraz sahibini - bütün dövr ərzində 2320 istiqraz sahibini, 250 manat 30 istiqraz sahibini - bütün dövr ərzində 2400 istiqraz sahibini və nəhayət, 100 manat hər tirajda 6 istiqraz sahibini - bütün dövr ərzində 600 istiqraz sahibini sevindirə bilər.

Bankın mütəxəssislərinin hesablamalarına əsasən, orta gəlirliliyə malik hər bir vətəndaşa ailə büdcəsinin qənaət olunmuş hissəsini depozitə deyil, istiqraza - pulun etibarlı və əlverişli yerləşdirilməsinə yatırım etməsi sərfəlidir. Belə ki, bu yatırım müxtəlif pul uduşları şansı və istənilən anda nağd pul deməkdir. Lotereyalarla tiraj qabağı istiqraz sahibinin emosional vəziyyətini müşahidə etsək, heç bir zaman sönməyən ümid və uduş şansı hər bir insana məxsusdur. Pulun nəinki tez, hətta bir anda xərclənmə kimi xüsusiyyətləri var və belə bir məhsul bizə böyük olmasa da, əlavə vəsaitimizi istiqrazlara yatırım etmək imkanını yaradır. Axı bu qiymətli kağızlar sadəcə istiqraz deyil, klassika, müxtəlif pul uduşlarına böyük şans, illik gəlir və istənilən anda onları pula çevirə bilmək imkanıdır.

- Rasim müəllim, 10 ilə təminat varmı?

- Qeyd edək ki, istiqrazların ödənilməsinin təminatçısı kimi emitent özü çıxış edir. Bu qiymətli kağızın emissiya olunması məqsədilə Qiymətli Kağızlar üzrə Dövlət Komitəsindən müvafiq icazə alınması üçün təqdim olunmuş sənədlər toplusunda bankın öhdəlikləri dəqiq göstərilib və bank üzərinə götürdüyü öhdəlikləri yerinə yetirmək iqtidarındadır. Bu proyektin ilk günlərinin gedişi bir daha təsdiq edir ki, bankımızın proyekt üzrə biznes planı əsaslanmış arqumentlər üzərində qurulub.

- Tirajların şəffaf keçirilməsi vəd edilir...

- Qeyd etdiyimiz kimi, ilk tiraj bu ilin dekabr ayının 15-də keçiriləcək. Tirajın keçirilməsi zamanı istiqraz sahiblərinin iştirak etmək imkanlarının olması faktı ilə yanaşı, hər bir tiraj bankın internet (www.muganbank.az) saytında birbaşa canlı nümayiş etdiriləcək. Bundan əlavə, bütün tirajların uduşa düşmüş istiqrazların nömrələri əks olunan cədvəllərinin nəşrini həm bankın saytında, həm də «Xalq qəzeti»nin səhifələrində dərc olunacaq.