Maliyyə

Ana səhifə

Maliyyə

Azərbaycan bank sisteminin xalis xarici aktivləri artır

26 noyabr 2009 09:10 (UTC +04:00)

Bakı. Vahab Rzayev – APA-Economics. Azərbaycan bank sisteminin xalis xarici aktivlərinin həcmi 2009-cu ilin noyabr ayının 1-nə 3 481,1 mln. manat təşkil edib ki, bu da ötən ilin müvafiq dövrü ilə müqayisədə 11,1%, cari ilin əvvəlindən 13,8% azdır.

Azərbaycan Mərkəzi Bankından «APA-Economics»ə verilən məlumata görə, təkcə oktyabr ayında bu göstərici 9% artıb ki, bu da xalis xarici aktivlərin dinamikasında artım tendensiyasının yaranması kimi qiymətləndirilə bilər.

Bank sisteminin xalis xarici aktivlərinin tərkibində Azərbaycan Mərkəzi Bankının xalis xarici ehtiyatlarının həcmi noyabrın 1-nə 4 172,4 mln. manata bərabər olub. Ötən ilin eyni göstəricisi ilə müqayisədə 13,4%, cari ilin əvvəlindən 18,4%-lik azalma müşahidə olunsa da, oktyabr ayında 7,3%-lik artım baş verib.

Kommersiya banklarının xalis xarici aktivlərinin həcmi isə noyabrın 1-nə mənfi 621,4 mln. manat təşkil edib. Bu göstərici ötən ilin noyabrın 1-nə mənfi 612,3 mln. manat, cari ilin əvvəlinə mənfi 868,8 mln. manat, oktyabrın 1-nə isə mənfi 629,8 mln. manata bərabər olduğunu nəzərə alsaq, məlum olur ki, kommersiya banklarının xalis xarici aktivlərində müsbət dinamika müşahidə olunur.

Qeyd edək ki, xalis xarici aktivlər xarici aktivlərlə xarici öhdəliklər arasında olan fərqdir. Beləliklə, Mərkəzi Bankdan fərqli olaraq, kommersiya bankları üzrə xarici öhdəliklər xarici aktivləri üstələyir.

Həmçinin qeyd olunmalıdır ki, yekunlaşdırıcı xalis xarici aktivlərdə yer alan digər xarici aktivlərin mənfi həcmi son bir ildə 4,1 dəfə, ilin əvvəlindən 3 dəfə azalaraq 2009-cu ilin noyabrın 1-nə 70 mln. manata çatıb.