Maliyyə

Ana səhifə

Maliyyə

Azərbaycanın fond bazarında korporativ qiymətli kağızlar üzrə əməliyyatların həcmi yanvar-oktyabr aylarında 10% artıb

26 noyabr 2009 09:12 (UTC +04:00)

Bakı. Nicat Mustafayev – APA-Economics. Bu ilin yanvar-oktyabr ayları ərzində Azərbaycanın fond bazarında korporativ qiymətli kağızlar üzrə aparılan əməliyyatların həcmi ötən ilin analoji dövrü ilə müqayisədə 10% artaraq 359,434 mln. manat təşkil edib.

Qiymətli Kağızlar üzrə Dövlət Komitəsindən «APA-Economics»ə verilən məlumata görə, hesabat dövründə 3 231 əməliyyat qeydə alınıb ki, bu da ötən ilin yanvar-oktyabr ayları ilə müqayisədə 1,7 dəfə azdır. Əqdlərin sayının azalmasına baxmayaraq, əməliyyatların həcmi 10% artıb.

Eyni zamanda, hesabat dövründə səhmlər üzrə 3 176 əqd qeydə alınıb ki, bunların həcmi 270,070 mln. manat təşkil edib. Nəticədə, səhmlər üzrə əqdlərin həcmi 1,7 dəfə, əməliyyatların həcmi isə 4% azalıb. Səhmlərin ilkin yerləşdirilməsi üzrə əməliyyatların həcmi 0,2% artaraq 139,863 manat, təkrar yerləşdirilməsi üzrə 13,9 dəfə artaraq 35,354 mln. manat, səhmlərin birjadankənar təkrar yerləşdirilməsinin həcmi isə ötən ilin yeni dövrü ilə müqayisədə 32% azalaraq 94,853 mln. manat təşkil edib.

Korporativ istiqrazlara gəldikdə isə, hesabat dövründə bu növ qiymətli kağızlar üzrə aparılan əməliyyatların həcmi ötən ilin ilk on ayı ilə müqayisədə 90% artaraq 89,365 mln. manat təşkil edib. Korporativ istiqrazlar üzrə də əqdlərin sayı azalıb. Belə ki, əgər 2008-ci ildə bu növ kağız üzrə əqdlərin sayı 100 ədəd təşkil edirdisə, artıq 2009-cu ildə əqdlərin sayı 45% azalaraq 55 ədəd təşkil edib.

Bununla yanaşı, korporativ istiqrazların ilkin yerləşdirilməsi üzrə əməliyyatların həcmi ötən ilin yanvar-oktyabr ayları ilə müqayisədə 60% artaraq 41,148 mln. manata, təkrar bazarda əməliyyatların həcmi isə 20,7 dəfə artaraq 45,328 mln. manata çatıb.

Valyuta korporativ istiqrazlarının (ABŞ dolları) ilkin yerləşdirilməsi üzrə əməliyyatların həcmi 63% azalaraq 2,412 mln. manat, təkrar yerləşdirilməsi üzrə isə 98% azalaraq 282 min manat təşkil edib. Korporativ istiqrazların birjadankənar təkrar yerləşdirilməsi üzrə isə əməliyyatların həcmi ötən ilin yanvar-oktyabr ayları ilə müqayisədə 6,6 dəfə artaraq 195 min manat təşkil edib.