Maliyyə

Ana səhifə

Maliyyə

Azərbaycan parlamenti 2010-cu il üçün dövlət büdcəsini təsdiqləyib - YENİLƏNİB

Azərbaycan parlamenti 2010-cu il üçün dövlət büdcəsini təsdiqləyib - <font color=red>YENİLƏNİB</font>

26 noyabr 2009 10:14 (UTC +04:00)

«APA-Economics»in bildirdiyinə görə, Milli Məclisin sədri Oqtay Əsədov deputatlara investisiya proqramına dair təkliflərini büdcə layihəsinin müzakirəsində deyil, mart ayında hökumətin hesabatı zamanı təqdim etməyi tövsiyə edib. Spiker bildirib ki, belə olan halda hökumətin bu təklifləri dövlət büdcəsinin layihəsi hazırlanarkən nəzərə alması da asanlaşacaq.

Maliyyə naziri Samir Şərifov bildirib ki, dövlət büdcəsinin ümumi xərclərində artım baş verməyib. Maliyyə naziri bildirib ki, büdcə xərclərinin daxilində bəzi dəyişikliklər edilib. Bir neçə sahə üzrə nəzərdə tutulan vəsaitlər artırılıb. Belə ki, büdcədə alternativ enerji mənbələrinin işlənilməsi, o cümlədən ekoloji durumun yaxşılaşdırılması məqsədi ilə 2010-cu ildə icmal büdcənin tərkib hissəsi olan Dövlət Neft Fondunun büdcə xərcləri 20 mln. manat artırılacaq. Artım üçün nəzərdə tutulan vəsaitdən 2010-cu ilin «Ekologiya ili» elan olunması ilə əlaqədar ekoloji tədbirlərin və dövlət proqramlarının maliyyələşdirilməsinə, ekoloji-təmiz alternativ enerji mənbələrinin yaradılması ilə bağlı xərclərə yönəldilməsi nəzərdə tutulur. Artımlar nəzərə alınmaqla, 2010-cu il üçün icmal büdcənin xərclərinin yuxarı həddi 12,636 mlrd. manat təşkil edəcək.

S.Şərifovun sözlərinə görə, elmi-tədqiqat institutlarının fəaliyyətinin yaxşılaşdırılması, müasir avadanlıqlarla təminatının gücləndirilməsi üçün elm xərclərinə əlavə olaraq 3 mln. manat, dərman preparatları ilə təchizatın yaxşılaşdırılması, şəkər diabeti üzrə dövlət proqramı və digər proqramların maliyyə təminatı ilə bağlı səhiyyə xərclərinə əlavə olaraq 4 mln. manat, tarixi abidələrin bərpası, xaricdə Azərbaycan mədəniyyəti mərkəzlərinin yaradılması, sənədli filmlərin çəkilişi və digər mədəniyyət tədbirlərinin maliyyələşdirilməsi üçün mədəniyyət xərclərinə isə əlavə olaraq 6,3 mln. manat ayrılacaq. Bundan başqa, Milli Məclisin və Xarici İşlər Nazirliyinin əməkhaqqı fondu müvafiq olaraq 458 min və 580 min manat artırılması məqbul sayılıb.

Ümumilikdə, deputatların təklifi ilə ayrı-ayrı sahələr üçün təklif olunan cəmi 14,3 mln. manat vəsaitin 93%-i sosialyönümlü tədbirlərin maliyyələşdirilməsinə yönəldiləcək.

«Bu xərclərin ayrılması dövlət büdcəsi xərclərinin artımına gətirib çıxarmayacaq. Dövlət büdcəsi xərclərinin məbləği əvvəlki kimi 11,264 mlrd. manat səviyyəsində qalacaq. Bəzi xərclərə tətbiq ediləcək artım isə 2010-cu il büdcəsində valyuta konvertasiyası üçün nəzərdə tutulan vəsaitin azaldılması hesabına həyata keçiriləcək», - deyə S.Şərifov vurğulayıb.

Qeyd edək ki, 2010-cu il dövlət büdcəsinin gəlirləri 12 177 mln. manat, xərcləri isə 12 355 mln. manat həcmində saxlanılıb.

Dövlət Sosial Müdafiə Fondunun (DSMF) sədri Səlim Müslümov isə qeyd edib ki, deputatların təklilərini digər əlaqədar qurumlarla müzakirə ediblər və növbəti ildə müəyyən irəliləyişin əldə olunması üçün mənbələrin axtarılması qərara alınıb. S.Müslümov qeyd edib ki, DSMF-nin 2010-cu il büdcəsinin gəlir və xərcləri müvafiq olaraq 1 757,216 mln. manat səviyyəsində müəyyənləşdirilib. Azərbaycanda yaşayış minimumu 87 manat, ehtiyac meyarı isə 65 manat məbləğində təsdiq edilib.

Həmçinin, Milli Məclisin xərcləri 16 827 033 manat, Hesablama Palatasının xərcləri isə 3 727 021 manat təsdiq edilib.

Daha sonra qanun layihələri ayrı-ayrılıqda səsə qoyulub. Dövlət büdcəsi və büdcə zərfinə daxil olan digər qanun layihələrinin hər biri 101 nəfər lehinə, 8 əleyhinə olmaqla qəbul edilib.