Maliyyə

Ana səhifə

Maliyyə

Azərbaycan Beynəlxalq Bankı Avrasiya regionu üzrə bank renkinqinin düzgün hazırlanmadığını bəyan edir

02 dekabr 2009 09:23 (UTC +04:00)

Bakı. Elnur Hüseynquluyev – APA-Economics. Azərbaycan Beynəlxalq Bankı (ABB) BNE portalının (www.businessneweurope.eu) dərc etdiyi Avrasiya regionunda aparıcı 200 bankın renkinqinin şərhini əsassız sayır. Bu barədə «APA-Economics»ə bankın mətbuat xidmətinin rəhbəri Rauf Ağayev bildirib.

R.Ağayevin sözlərinə görə, hazırlanan renkinqdə dünya maliyyə böhranının təsiri nəticəsində son bir il ərzində ABB-nin aktivlərinin 1,1 mlrd. ABŞ dolları həcmində azaldığı göstərilir. «Bununla əlaqədar olaraq bildiririk ki, 2008-ci ilin dekabr ayının 31-nə ABB-nin aktivlərinin həcmi 4,316 mlrd. manat səviyyəsində olub ki, bu da 2007-ci ilin yekunu ilə müqayisədə 68% çoxdur. Cari ilin oktyabr ayının 1-i tarixinə isə ABB-nin aktivləri 4,758 mlrd. manat (təqribən 6 mlrd. ABŞ dolları) həcmində olub. Bankın aktivlərində azalma deyil, əksinə əsaslı artım olduğu aydın görünür. Eləcə də, həmin portalın göstərdiyi kimi, ABB-nin Avrasiya regionu bankları arasında 42-ci yerdən 32-ci yerə yüksəlməsi aktivlərin azalması deyil, artımı ilə əlaqədar ola bilər», - deyə bankın mətbuat xidmətinin rəhbəri bildirib.

Xatırladaq ki, BNE portalı Avrasiya regionu üzrə aktivlərinə görə 200 ən böyük bankın (Top-200) illik renkinqini hazırlayıb. Renkinqə əsasən, ABB Qafqazın ən iri bankı adını qoruyub saxlamaqla ötən ilki 42-ci yerdən 32-ci yerə yüksəlib, lakin bu müddət ərzində bankın aktivləri 5,2 mlrd. dollardan 4,1 mlrd. dollara enib.

Qeyd edək ki, «APA-Economics»in 2009-cu ilin yanvar-sentyabr ayları üzrə tərtib etdiyi renkinqə əsasən, ABB son bir ildə aktivlər üzrə 13% artıma nail olub və aktivlərin ümumi həcmini cari ilin oktyabr ayının 1-i vəziyyətinə təxminən 5,926 mlrd. dollara çatdırıb.

Azərbaycan və regionun ən iri bank kredit təşkilatı olan ABB 1992-ci ildən fəaliyyət göstərir. Bankın nizamnamə kapitalında dövlətin iştirak payı 50,2% təşkil edir. Səhmlərin qalan 40%-i xüsusi mülkiyyətdədir, 10%-i isə bankın əmək kollektivinə məxsusdur. Cari ilin oktyabr ayının 1-nə bankın aktivlərinin həcmi 4 758,574 mln. manat, depozit portfeli 1 944,185 mln. manat, kredit portfeli 3 596,347 mln. manat, məcmu kapitalı 452,106 mln. manat, o cümlədən nizamnamə kapitalı 200 mln. manat təşkil edib. Hazırda bankın respublika üzrə 37 filialı, 587 bankomatı, 2717 POS-terminalı mövcuddur.