Maliyyə

Ana səhifə

Maliyyə

Bakıda «YapıKredi Bank Azerbaijan»ın daha bir filialı istifadəyə verilib

08 dekabr 2009 12:38 (UTC +04:00)

Bakı. Elnur Hüseynquluyev - APA-Economics. Bakının Əhmədli qəsəbəsində «YapıKredi Bank Azerbaijan» Qapalı Səhmdar Cəmiyyətinin (QSC) yeni filialı istifadəyə verilib. Bu barədə «APA-Economics»ə bankın baş mühasibi Mətanət Qasımova məlumat verib.

M.Qasımovanın sözlərinə görə, Bakının Xətai rayonu, Sarayevo küçəsi, 3 ünvanında yerləşən filial müştərilərə bütün bank xidmətləri, o cümlədən hesablaşma-kassa hesabı, kredit depozit əməliyyatları sürətli pulköçürmələr və digər bank xidmətləri göstərəcək.

M.Qasımova həmçinin qeyd edib ki, bank 2010-cu ilin yanvar ayında Bakının Yusif Məmmədəliyev küçəsi, 13 ünvanında daha bir filialını açmaq niyyətindədir. Hazırda isə həmin filialda tikinti-təmir işləri aparılır.

Qeyd edək ki, bu yaxınlarda bankın «28 May» şöbəsinin hüquqi ünvanı da dəyişib. Belə ki, hazırda həmin şöbə Bakının Rəşid Behbudov küçəsi, 8 ünvanında fəaliyyət göstərir.

Xatırladaq ki, təsisçisi Türkiyənin «Yapı Kredi Bank» (80%) və Beynəlxalq Maliyyə Korporasiyası (20%) olan «YapıKredi Bank Azerbaijan» SKB Azərbaycanda 2000-ci ildən fəaliyyət göstərir. Hazırda bankın respublika üzrə 5 filialı mövcuddur.