Maliyyə

Ana səhifə

Maliyyə

Azərbaycan Kredit İttifaqları Assosiasiyası daha bir beynəlxalq quruma üzv ola bilər

09 dekabr 2009 10:37 (UTC +04:00)

Bakı. Elnur Hüseynquluyev - APA-Economics. Azərbaycan Kredit İttifaqları Assosiasiyası (AKİA) bu ilin mart ayında Asiya Ölkələri Kredit İttifaqları Konfederasiyasına (AÖKİK) üzv ola bilər. Bunu «APA-Economics»ə açıqlamasında AKİA-nın İdarə Heyətinin sədri Elçin Bağırov bildirib.

E.Bağırovun sözlərinə görə, artıq AKİA tərəfindən quruma üzvlüklə bağlı müraciət olunub və beynəlxalq təşkilat tərəfindən həmin müraciətlər cavablandırılıb. Cavabda Asiya Ölkələri Kredit İttifaqları Konfederasiyasının 2010-cu ilin mart ayında keçiriləcək illik toplantısında AKİA-nın bu təşkilata üzvlük məsələsinin müzakirə olunacağı bildirib.

E.Bağırov beynəlxalq təşkilata üzvlük haqqı məsələsinin də həll olunduğunu qeyd edib. Belə ki, AKİA quruma üzv olduqdan sonra illik 1000 ABŞ dolları həcmində üzvlük haqqı ödəyəcək. Üzvlük haqqının həcmi AKİA üçün güzəştli şərtlərlə qəbul edilib.

Qeyd edək ki, hazırda AKİA 100 ölkənin üzv olduğu Ümumdünya Kredit İttifaqları Şurasına (WOCCU - World Council of Credit Unions) bu ilin mart ayından üzvdür.

Ümumdünya Kredit İttifaqları Şurası (WOCCU) bütövlükdə kredit ittifaqlarının beynəlxalq təşkilatı və maliyyə təşkilatı kooperativləri kimi 1971-ci ildə təsis edilib. WOCCU təşkilatının üzvləri dünya üzrə 177 milyon səhmdarı və 49 mindən çox kredit ittifaqını təmsil edən kredit ittifaqlarının regional və milli assosiasiyalarından ibarətdir. Bu kredit ittifaqlarının aktivlərinin ümumi həcmi 1 trln. 181 mlrd. ABŞ dollar təşkil edir. WOCCU təşkilatının qərargahı ABŞ-ın Medison şəhərində yerləşir. Təşkilatının fəaliyyəti maliyyə vasitələrinə keçidi olmayan kredit ittifaqlarının fəaliyyətinin yaxşılaşdırılmasına və informasiya dəstəyinin göstərilməsinə yönəldilib.

Xatırladaq ki, AKİA 2003-cü ildən fəaliyyət göstərir. Azərbaycanda fəaliyyət göstərən 79 kredit ittifaqından 47-si qurumun üzvüdür. Assosiasiyanın üzvü olan kredit ittifaqlarının 35-i kənd təsərrüfatının kreditləşməsində iştirak edir. Quruma kredit ittifaqları tərəfindən ödənilən rüblük üzvlük haqqı 100 manat, yeni qəbul edilən ittifaqlar üçün isə 30 manat təşkil edir.