Maliyyə

Ana səhifə

Maliyyə

Azərbaycanın Nəqliyyat Nazirliyi ilə Fransanın “BNP Paribas” Bankı arasında kredit sazişi imzalanıb

09 dekabr 2009 10:54 (UTC +04:00)

Bakı. Rəşad Süleymanov – APA-Economics. Dekabrın 8-də Azərbaycanın Nəqliyyat Nazirliyi ilə Fransanın “BNP Paribas” Bankı arasında İsrailin ASHRA İxrac Kredit Agentliyinin sığortası ilə təmin edilmiş kredit sazişi imzalanıb. Bu barədə «APA-Economics»ə Nəqliyyat Nazirliyinin katibliyindən məlumat verilib.

Kredit sazişini Azərbaycan tərəfdən nəqliyyat naziri Ziya Məmmədov və maliyyə naziri Samir Şərifov imzalayıb. Kreditin məbləği 270 mln. ABŞ dolları dəyərindədir. Vəsait “Bakı-Şamaxı-Yevlax” avtomobil yolunun (M4-280 km), “Muğanlı-Yevlax” hissəsinin (156 km) yenidən qurulması məqsədilə ayrılıb. Kreditin müddəti 14 il, verilmə dövrü 4 ildir. Qaytarılma dövrü hər 6 aydan bir olmaqla 20 bərabər ödənişlər şəklində, kredit Sazişinin qüvvəyə minməsindən 54 ay sonra və ya son kredit vəsaitlərinin ayrılması tarixindən 6 ay sonra başlamaqla 10 ildir. Ödənişlər hər ilin 15 iyun və 15 dekabr tarixlərində icra edilməlidir. Faiz dərəcəsi 6 aylıq LIBOR dərəcəsi (ABŞ dolları ilə) + marja şəklində (marja [3,50%] illik) müəyyənləşdirilib.

Sazişə əsasən «BNP Paribas» (ümumi öhdəliklərin 70%-i) 189 mln. dollar, «Bank Leumi Le Israel B.M.” (ümumi öhdəliklərin 15 %-i) 40,5 mln. dollar, «Bank Hapoalim B.M» (ümumi öhdəliklərin 15 %-i) 40,5 mln.dollar kredit ayıracaq.