Maliyyə

Ana səhifə

Maliyyə

Azərbaycanda iqtisadiyyatın maliyyələşməsində bank sektorunun rolu artır

09 dekabr 2009 12:12 (UTC +04:00)

Bakı. Vahab Rzayev - APA-Economics. Azərbaycan iqtisadiyyatın maliyyələşməsində bank sektorunun rolunun artması davam edir və pul kütləsinin (M3) qeyri-neft ÜDM-ə nisbəti 2004-cu ildəki 28,7%-dən 2009-cu ilin 9 ayın yekunlarına əsasən 52,4%-dək artıb. “APA-Economics”in xəbərinə görə, bu barədə Azərbaycan Mərkəzi Bankı tərəfindən hazırlanmış və cari ilin üç rübünü əhatə edən “Maliyyə Sabitliyi İcmal”ında deyilir.

İcmala əsasən, 2008-ci ilin ikinci yarısından başlayaraq bank sektorunda artım templəri stabilləşsə də, cari ilin əvvəli ilə müqayisədə bank aktivləri 496,2 mln. manat və ya 4,8% artaraq 2009-cu ilin oktyabrın 1-nə 10,8 mlrd. manata çatıb. Eyni zamanda cari ilin birinci rübündə aktivlərin dinamikasında müşahidə olunan mənfi dinamika (xarici borcun qaytarılması ilə bağlı) ikinci rübdən başlayaraq pozitiv trendlə əvəzlənib.

İlin əvvəli ilə müqayisədə bank kreditləri 582,3 mln. manat və ya 8,3% artaraq oktyabrın 1-nə 7 599 mln. manat səviyyəsinə çatıb. Hüquqi şəxslərə verilmiş kreditlərin həcmi 2009-cu ilin 9 ayında 13% artaraq 5463,6 mln. manat təşkil edib.

Ev təsərrüfatlarına verilmiş kreditlərin həcmi sentyabr ayının sonuna 2 300,0 mln. manat təşkil edib. Cari ilin III rübün sonuna ev təsərrüfatlarına verilmiş cəmi kredit portfelində sahibkarlıq fəaliyyəti və istehlak üçün verilmiş kreditlərin xüsusi çəkisi müvafiq olaraq 8% və 77% təşkil edib. Kredit portfelinin 10%-i isə daşınmaz əmlakla bağlı kreditlərin payına düşür. Cari ilin III rübünün sonuna ötən ilin müvafiq dövrü ilə müqayisədə fiziki şəxslərin kredit borcunun azalması (-5.5%), əmanətlərinin isə əksinə, artması (12.2%) nəticəsində kreditlərin əmanətlərə olan nisbəti 128,8%-dən 108,5%-dək enib. Bu da ev təsərrüfatları üçün yenidənmaliyyələşdirmə riskinin azaldığını göstərir.

Mərkəzi Bankın hesablamalarına görə, bankların fəaliyyətinin mütləq göstəricilərinin sabitləşməsinə baxmayaraq, bank sisteminin institusional inkişafı davam edib. Cari ilin 9 ayı ərzində bankların filial şəbəkəsi 567-dən 618-dək artıb. Bank şəbəkələrinin sayı isə 99-dan 103-ə çatıb. Bank filialların 265-i və ya 43%-i regionlarda fəaliyyət göstərir.