Maliyyə

Ana səhifə

Maliyyə

AİB-in departament direktoru Azərbaycana səfər edəcək

09 dekabr 2009 15:23 (UTC +04:00)

Bakı. Nicat Mustafayev - APA-Economics. Bu il dekabrın 13-də Asiya İnkişaf Bankının (AİB) Mərkəzi və Qərbi Asiya departamentinin energetika və təbii sərvətlər üzrə direktoru Pil-Bey Sonq (Pil-Bae Song) Azərbaycana səfər edəcək. Bu barədə «APA-Economics»ə AİB-in Bakıdakı ofisindən məlumat verilib.

«Səfər əsasən tanışlıq xarakteri daşıyacaq. Belə ki, AİB rəsmisi hazırda Azərbaycanda icra olunan və AİB tərəfindən maliyyələşdirilən energetika layihələrinin icrası ilə tanış olacaq», - deyə bankın ofisindən bildirilib.

Dekabrın 18-dək davam edəcək səfər çərçivəsində P.Sonq Azərbaycan Sənaye və Energetika Nazirliyi, «Azərenerji» və digər dövlət qurumlarında görüşlər keçirəcək.

Qeyd edək ki, hazırda AİB Azərbaycanda özünün Mərkəzi Asiya Regional İqtisadi Əməkdaşlıq Proqramı (CAREC) üzrə qəbul edilmiş enerji strategiyasını həyata keçirir. Hazırda isə «Elektrik enerjisinin ötürülməsi sisteminin yaxşılaşdırılması Layihəsi» (Power Transmission Enhancement Project) icra olunur.