Maliyyə

Ana səhifə

Maliyyə

“MuğanBank”ın istiqrazları üzrə birinci uduş tirajı keçiriləcək

10 dekabr 2009 08:26 (UTC +04:00)

Bakı - APA-Economics. Azərbaycanın “MuğanBank” ASC-nin istiqrazları üzrə birinci uduş tirajı cari ilin dekabrın 15-də, saat 11:00-da “MuğanBank”ın baş ofisində keçiriləcək (Ünvan: Bakı şəhəri, Ə.Rəcəbli 21B).

Bankdan “APA-Economics”ə verilən məlumata görə, tiraj Komissiyasının iştirakı ilə birinci yüz uduş oynanılacaq.

Qeyd edək ki, oktyabrın 30-da “MuğanBank” ASC Azərbaycan Qiymətli Kağızlar üzrə Dövlət Komitəsi tərəfindən 14 avqust 2009-cu il tarixində AZ 200200546 saylı Dövlət Qeydiyyat Nömrəsi ilə təsdiq olunmuş adsız, faizli istiqrazların yerləşdirilməsinə başlayıb.

Bir istiqrazın nominal dəyəri 50 (əlli) manatdır. İstiqraz emitent tərəfindən 10 (on) illik müddətə emissiya olunub və illik 2 (iki) faiz gəlirlilik təmin edir. İstənilən şəxs istiqraz əldə edə və 10 000 manat udmaq şansı qazana bilər. İstiqrazlar udmadığı təqdirdə, onları bankın istənilən filialına qaytarmaq və ödənilən pulları geri almaq olar. Ayrılıqda hər bir istiqrazın seriya nömrəsi emitent tərəfindən hər 45 (qırx beş) gündən bir təşkil olunan tirajda iştirak edir və aşağıdakı uduşlara sahib olmaq şansı verir: 10.000 man. (2 ədəd), 5000 man. (5 ədəd), 2500 man. (10 ədəd), 1000 man. (18 ədəd), 500 man. (29 ədəd), 250 man. (30 ədəd), 100 man. (6 ədəd).

Tirajın canlı yayımını, habelə tirajda udmuş bütün nömrələri www.muganbank.az saytında, həmçinin “Xalq qəzeti”ndə yoxlamaq mümkün olacaq.

Hazırda istiqrazların Azərbaycan bazarında analoqu yoxdur. İstiqrazlar sahiblərinə gözəl hədiyyə, eyni zamanda büdcəni artırmaq üçün əla şans ola bilər.

Xatırladaq ki, “Muğan Bank” ASC Azərbaycan Milli (Mərkəzi) Bankının lisenziyası əsasında 1992-ci ildə təsis edilib. Yarandığı gündən bankın başlıca vəzifələri ölkə iqtisadiyyatının inkişafında fəal iştirak etmək, geniş əhali kütləsinə hər cür bank xidməti göstərmək və bu səylə bank sistemində qabaqcıl maliyyə institutlarından birinə çevrilmək olub. Hazırda “MuğanBank” ASC-nin 28 filialı və şöbəsi var.