Maliyyə

Ana səhifə

Maliyyə

“Financial Times”: Qonşu ölkələr iqtisadiyyatın bərpası uğrunda mübarizə apardığı halda, Azərbaycan iqtisadi artımı davam etdirib

11 dekabr 2009 13:29 (UTC +04:00)

Bakı-APA-Economics. Nüfuzlu “Financial Times” qəzetində Azərbaycandakı investisiya mühitinə həsr olunmuş məqalə dərc olunub. “APA-Economics”in məlumatına görə, müəllifi Denis Lo (Denise Law) olan “Azərbaycandakı investisiya imkanları” (“Investment opportunities in Azerbaijan”) adlı məqalədə bildirilir ki, Azərbaycan iqtisadiyyatı tənəzzülə qarşı Mərkəzi Asiya regionunun əksər inkişafda olan keçid iqtisadiyyatlı ölkələrindən daha yaxşı davamlılıq nümayiş etdirib, qonşu ölkələr iqtisadiyyatın bərpası uğrunda mübarizə apardığı halda, Azərbaycan orta artım dinamikası ilə iqtisadi artımı davam etdirib.

“Əsasən özəl sektorda formalaşan dinamika hesabına olmaqla son 10 il ərzində ölkənin iqtisadiyyatı inanılmaz həddə - 900 faiz böyüyüb. Buna baxmayaraq, Azərbaycanın iqtisadi potensialı hələ də tam kəşf edilməmiş qalır və sərmayəçilər və fond menecerləri alternativ kimi yeni inkişafda olan bazarları seçirlər. Regiondan olan ekspertlər hesab edir ki, 2010-cu ildə ölkənin yüksək səviyyəli xarici investisiyalar cəlb etmək imkanı olacaq”.

Müəllifin fikrincə ölkə uzun illər böyük təbii sərvətlər ehtiyatlarından faydalansa da, son illərdə iqtisadiyyatın diversifakisyası həyata keçirilib, nəqliyyat, infrastruktura və texnologiyaya kimi sahələr inkişaf etməyə başlayıb”.

Məqalədə “Paşa Bank”ın sədri Fərid Axundovun fikirlərinə də yer verilib: “Uzun illər azərbaycanlılar bir qədər özlərinə qapılmışdı. Ölkənin təşviqində aktivlik göstərmirdilər.
Eyni zamanda, bu bizim niyə yüksək səviyyəli maliyyə alətlərində iştirak etmədiyimizi izah edə bilər. Sadəcə biz buna etibar etmirdik”.

Müəllif bildirir ki, kiçik və orta müəssisələr hələ də qlobal tələbatda yaranan azalmanın təsirindən ziyan çəksələr də, Qazaxıstandan fərqli olaraq Azərbaycan heç vaxt maliyyə bazarlarından həddindən artıq dərəcədə asılı olmayıb.

“Yerli şirkətlər indi xarici investorlarla əlaqələr qurmağa daha böyük həvəs göstərirlər. Oktyabrda Avropa Yenidənqurma və İnkişaf Bankı Azərbaycan Metanol Şirkətinin (AzMeCo) sahibi olduğu metanol zavodunun tikintisi layihəsinin maliyyələşdirilməsinə 120 milyon dollar (73 milyon avro) ayırıb. Bu səylərin davamı kimi, icraçı direktorlar və fond menecerləri bu həftə Londonda I Azərbaycan İnvestisiya Sammitində bir araya gəldilər. Bütün bunlara baxmayaraq, Azərbaycan böyük mənfəət əldə etməyə səy göstərən fond menecerləri arasında daha populyardır. Ümumilikdə, son dövrlərdə inkişafda olan keçid iqtisadiyyatlı ölkələrə investorlar daha az maraq göstərməyə başlasalar da, ekspertlər Azərbaycanın gələcəyi, xüsusən də böhrandan sonrakı durumu barədə optimistik fikirdədirlər”.