Maliyyə

Ana səhifə

Maliyyə

Azərbaycanda bank depozitləri üzrə orta gəlirlik artır

14 dekabr 2009 12:12 (UTC +04:00)

Bakı. Vahab Rzayev – APA-Economics. Azərbaycanda milli valyuta ilə depozitlər üzrə orta faiz dərəcələri 2009-cu ilin əvvəli ilə müqayisədə 0,3 faiz bəndi azalaraq noyabrın 1-i vəziyyətinə illik 11,91% təşkil edib.

Azərbaycan Mərkəzi Bankından «APA-Economics»ə verilən məlumata görə, xarici valyutada depozitlər üzrə orta faiz dərəcələri isə 2,93 faiz bəndi artaraq illik 10,89% təşkil edib:

	Depozitlər üzrə orta		Hüquqi şəxslər üzrə		Fiziki şəxslər üzrə
	Manat	Xarici valyuta	Manat	Xarici valyuta	Manat	Xarici valyuta
01.01.2009	11,61	7,96	9,48	5,40	12,54	12,43
01.11.2009	11,91	10,89	7,05	5,81	13,21	12,59

Göründüyü kimi, hüquqi şəxslər üzrə manat depozitlərindən başqa, bütün depozitlər üzrə orta faiz dərəcələri artıb. Bununla yanaşı, depozitlərin dinamikasında daha bir məqam diqqət çəkir. Belə ki, manat depozitləri üzrə faiz dərəcələri valyuta depozitlərinin faiz dərəcələrindən müəyyən qədər üstündür. Bu da ölkədəki makroiqtisadi vəziyyətlə uyğun olmayan bir haldır. Belə ki, 2009-cu il ərzində manat əsas xarici valyutalar olan dollar və avroya qarşı möhkəmlənib və belə olan şəraitdə banklar üçün manat depozitləri üzrə faiz dərəcələrinin daha aşağı səviyyədə təyin edilməsi məqsədə uyğun olmalıdır.

Qeyd edək ki, həmin amil kreditlər üzrə müşahidə olunur. Belə ki, manat kreditləri valyuta kreditlərindən daha ucuzdur ki, bu da bankların məzənnə risklərinin azaldılması məqsədi ilə bağlıdır. Lakin depozitlərdə banklar tədricən ucuzlaşan valyutada olan depozitlər üzrə faiz dərəcələrini bahalaşan manat depozitlərindən aşağı faizlə təklif edir.