Maliyyə

Ana səhifə

Maliyyə

«Texnikabank» son bir ildə aktivlərinin həcmini 18% artırıb

15 dekabr 2009 14:51 (UTC +04:00)

Bakı. Elnur Hüseynquluyev - APA-Economics. Azərbaycanın «Texnikabank» Səhmdar Kommersiya Bankının (SKB) aktivlərinin həcmi 2009-cu ilin dekabr ayının 1-nə 464,7 mln. manat təşkil edib ki, bu da ötən ilin analoji dövrünün göstəricisi ilə müqayisədə 17,5% çoxdur.

Bankın baş ofisindən «APA-Economics»ə verilən məlumata görə, cari ilin yanvar-noyabr aylarında bankın aktivlərinin gəlirliliyi 2,21% təşkil edib. Bu müddət ərzində bankın kredit portfelinin həcmi 11,3% artaraq 327,3 mln. manat, o cümlədən istehlak kreditləri 40,5 mln. manat təşkil edib. Həmçinin bankın depozit portfeli 15% genişlənərək 170,6 mln. manat, o cümlədən fiziki şəxslərin bankda yerləşdirdiyi depozitlərin həcmi 85,5 mln. manat olub.

Bu müddət ərzində bankın məcmu kapitalı cari ilin əvvəli ilə müqayisədə 12,9% artaraq 58,2 mln. manat, o cümlədən nizamnamə kapitalı 41,7 mln. manat təşkil edib. Hesabat dövründə bankın kapitalının gəlirliliyi 18,1% olub.

Qeyd edək ki, cari ilin noyabr ayı ərzində bankın ümumi gəlirləri 8,0% artaraq 58,8 mln. manat, o cümlədən faiz gəlirləri 48,7 mln. manat, qeyri-faiz gəlirləri isə 10,1 mln. manat təşkil edib. Nəticədə bankın xalis mənfəəti noyabr ayı ərzində 2,6% artaraq 9,9 mln. manata çatıb.

Xatırladaq ki, «Texnikabank» SKB 1993-cü ildən fəaliyyət göstərir. Hazırda bankın respublika üzrə 35 filialı, 58 bankomatı və 340 POS-terminalı mövcuddur.