Maliyyə

Ana səhifə

Maliyyə

«Bank of Azerbaijan» filial şəbəkəsini genişləndirir

17 dekabr 2009 11:15 (UTC +04:00)

Bakı. Vüqar Mustafayev – APA-Economics. «Bank of Azerbaijan» Səhmdar Kommersiya Bankı (SKB) 2010-cu il ərzində filial şəbəkəsinin optimallaşdırılması siyasətini davam etdirmək niyyətindədir. Bu barədə «APA-Economics»ə bankın İdarə Heyətinin sədri Xəyal Şərifzadə məlumat verib.

X.Şərifzadənin sözlərinə görə, gələn il açılacaq yeni filialların ikisi Bakı, biri isə Xırdalan şəhərinin ərazisində yerləşəcək. Belə ki, filialın biri Bakı şəhərinin Nizami rayonunda, ikincisi Xırdalan şəhərində açılacaq. Daha bir filial («Gənclik») isə paytaxtda «Gənclik» metro stansiyası yaxınlığında yerləşəcək.

«Əslində, «Gənclik» filialının açılışı Bankın fililal şəbəkəsinin optimallaşdırma siyasətinin davamıdır. Bankın dörd filialının birləşdirilərək yeni ünvana köçməsi bankın müştərilərinə daha da keyfiyyətli xidmətlərin təqdim edilməsinə şərayət yaradacaq», - deyə X.Şərifzadə bildirib.

Xatırladaq ki, səhmdarları «NEM Holding» və 2 fiziki şəxs olan «Bank of Azerbaijan» SKB 1993-cü ildən fəaliyyət göstərir. Hazırda bankın respublika üzrə 16 filialı, 26 bankomatı və 147 POS-terminalı fəaliyyət göstərir. Cari ilin oktyabr ayının 1-i vəziyətinə «Bank of Azerbaijan»ın aktivlərinin həcmi 144,531 mln. manat, depozit portfeli 60,219 mln. manat, kredit portfeli 111,204 mln. manat, o cümlədən istehlak kreditlərinin həcmi 14,777 mln. manat, məcmu kapitalı 19,270 mln. manat, o cümlədən nizamnamə kapitalı 15 mln. manat təşkil edib.