Maliyyə

Ana səhifə

Maliyyə

Azərbaycanın xarici ticarət dövriyyəsindəki müsbət saldo yanvar-noyabr aylarında 5 dəfədən çox azalıb

21 dekabr 2009 11:24 (UTC +04:00)

Bakı. Rəşad Süleymanov – APA-Economics. Cari ilin yanvar-noyabr aylarında Azərbaycanın xarici ticarət dövriyyəsində 7 716 872,5 min ABŞ dolları həcmində müsbət saldo yaranıb. Bu barədə «APA-Economics»ə Dövlət Gömrük Komitəsindən məlumat verilib.

Cari ilin 11 ayında ticarət dövriyyəsindəki müsbət saldo 2008-ci ilin müvafiq dövrü ilə müqayisədə 5,2 dəfə azalıb.

Hesabat dövründə Azərbaycandan xarici ölkələrə 13 165 547,8 min ABŞ dolları dəyərində mal ixrac, 5 448 675,3 min dollar dəyərində mal isə idxal edilib. O cümlədən, hesabat dövründə ölkəyə 26 202,4 min dollar dəyərində əmtəə beynəlxalq, humanitar və dövlət təşkilatlarının xətti ilə təmənnasız kömək və humanitar yardım kimi daxil olub.

Ötən ilin müvafiq dövrü ilə müqayisədə ixrac əməliyyatlarının həcmi 71,97%, idxalın həcmi isə 16,17% azalıb.

Yanvar-noyabr aylarında müvəqqəti ixrac rejimində Azərbaycandan 107 159,7 min dollar dəyərində mal ixrac edilib, 349 055,1 min dollar dəyərində mal isə müvəqqəti idxal olunub.

İxracın struktrunda əsas yeri xam neft (81,28%), neft məhsulları (10,35%), meyvə-tərəvəz (1,29%), idxalda isə maşın, elektrik avadanlıqları və onların ehtiyat hissələri (35,24%), nəqliyyat vasitələri və onların hissələri (12,87%), ərzaq məhsulları (11,57%) və digər əmtəələr təşkil edib.

Xam neftin ixracı 2008-ci ilin müvafiq dövrü ilə müqayisədə 14,1% azalıb, neft məhsullarının ixracı isə 1,2% artıb.

Hesabat dövründə Azərbaycanın ixracatında tərəfdaş qismində əsas yeri İtaliya (26,2%), ABŞ (12,09%), Fransa (8,38%), idxalında isə Rusiya (17,73%), Türkiyə (14,52%) və Almaniya (9,21%) tutub.

Qeyd edək ki, təhlil olunan dövr ərzində xarici ticarətlə 8 753 hüquqi və fiziki şəxs məşğul olub. İxrac əməliyyatlarında dövlət sektorunun payı 93,50%, özəl sektorun payı 5,4%, fiziki şəxslərin payı isə 1,07% olub. İdxalda isə bu göstərici müvafiq olaraq 32,63%, 62,51% və 4,86% təşkil edib.