Maliyyə

Ana səhifə

Maliyyə

Beynəlxalq Valyuta Fondu Ukraynaya kreditin növbəti tranşını ayırmaqdan imtina edib, Belarusa isə müsbət cavab verib

23 dekabr 2009 14:28 (UTC +04:00)

Bakı – APA-Economics. Beynəlxalq Valyuta Fondu (BVF) Ukraynaya verdiyi kreditin dördüncü tranşını ayırmaqdan imtina edib.

“APA-Economics”in məlumatına görə, bu barədə Ukraynanın maliyyə naziri əvəzi İqor Umanski açıqlama verib.

BVF 2010-cu ilin yanvarında keçiriləcək prezident seçkilərinə qədər Ukraynaya kreditin növbəti tranşını ayırmayacaq.

Qeyd edək ki, 2008-ci ildə BVF Ukraynaya 16,5 mlrd. dollar həcmində stabilləşdirici kredit ayırıb. Kreditin 4,5, 2,8 və 3,3 mlrd. dollarlıq üç tranşı artıq Kiyevə təqdim olunub. Amma 3,5-3,8 mlrd. dollarlıq dördüncü tranş Ukrayna prezidenti Viktor Yuşşenko ilə baş nazir Yuliya Timoşenko arasındakı fikir ayrılıqları səbəbindən gecikir. Prezident hesab edir ki, BVF-nin kreditləri Ukrayna iqtisadiyyatı üçün zərərlidir və ölkəni borc uçurumuna yuvarladır.

Ukraynadan fərqli olaraq, Belarus BVF-dən stabilləşdirici kreditin dördüncü tranşını ala bilib. Belarus Milli Bankından bildirilib ki, kreditin həcmi 688 mln. dollar təşkil edir. Kreditin beşinci tranşının isə 2010-cu ilin əvvəlində ayrılması gözlənilir.

Ümumilikdə Belarus BVF-yə 3,63 mlrd. dollar kredit ayrılması xahişi ilə müraciət edib. Bu günədək rəsmi Minskə 2,88 mlrd. dollar kredit ayrılıb.