Maliyyə

Ana səhifə

Maliyyə

Namiq Xəlilov: Maliyyə böhranı Azərbaycan sığorta bazarının əsasən bank sektoru ilə bağlı seqmentlərinə təsir göstərib - MÜSAHİBƏ

Namiq Xəlilov: Maliyyə böhranı Azərbaycan sığorta bazarının əsasən bank sektoru ilə bağlı seqmentlərinə təsir göstərib - <font color=red>MÜSAHİBƏ</font>

25 dekabr 2009 12:04 (UTC +04:00)

Azərbaycan Maliyyə Nazirliyi Dövlət Sığorta Nəzarəti Xidmətinin rəisi Namiq Xəlilovun «APA-Economics»ə müsahibəsi

- «İcbari sığortalar haqqında» qanun layihəsi nə vaxt təsdiqlənərək qüvvəyə minə bilər? Ümumiyyətlə, bu istiqamətdə aparılan işlər hansı mərhələdədir? Qanundakı əsas dəyişikliklərlə bağlı qısa məlumat verməyinizi istərdik.

- «İcbari sığortalar haqqında» qanun layihəsinə hazırda Azərbaycan Prezidentinin İcra Aparatında baxılır. Qanun layihəsi ümumi və xüsusi hissələrdən ibarət olmaqla tərtib edilib. Ümumi hissədə əsasən bu qanunla əhatə edilən icbari sığorta növlərinin hər birinə aid olan ümumi prinsip və normalar yer alıb. Xüsusi hissədə isə ayrı-ayrı icbari sığorta növlərinin özünəməxsus xüsusiyyətlərini əks etdirən müddəalar nəzərdə tutulub.

- Azərbaycanda fəaliyyət göstərən sığorta şirkətləri tərəfindən toplanan məcmu daxilolmalarının hansı hissəsi xaricə təkrar sığortaya yönəldilir?

- Qeyd edim ki, 2008-ci ilin yanvar ayının 1-nə olan statistik məlumatlara əsasən, həmin il ərzində xaricə təkrarsığortaya ötürülən məcmu təkrarsığorta haqları 35,2 mln. manat olub. Bu da həmin dövr ərzində ölkə ərazisində toplanan məcmu sığorta haqlarının 23,8%-nə, təkrarsığorta haqlarının isə 59,7%-nə bərabərdir. Bildiyiniz kimi, beynəlxalq təcrübənin tətbiqindən sonra ölkədə qəbul edilən «Sığorta fəaliyyəti haqqında» qanuna əsasən, hazırlanan hesabat formalarında, eyni zamanda informasiya bazasının strukturunda dəyişikliklər edilib. Bu səbəbdən də həmin hesabatlarda xaricə ötürülən təkrarsığorta haqları hesablanmır.

- Bu ilin yanvar-oktyabr aylarında ölkədə fəaliyyət göstərən sığorta təşkilatları tərəfindən 138,41 mln. manat həcmində sığorta haqqı toplanılıb. Sığorta daxilolmaları ilə bağlı cari ilin sonuna və 2010-cu il üçün gözlənilən proqnozlara dair fikirlərinizi bilmək istərdik.

- Bildirim ki, cari ilin sonuna ölkə ərazisində 170 mln. manat həcmində sığorta haqqının toplanacağı gözlənilir. Növbəti ilin proqnozlarına gəldikdə isə 2010-cu ildə 200 mln. manata qədər sığorta haqqının toplanacağı proqnozlaşdırılır.

- Dünya maliyyə böhranı Azərbaycanın sığorta bazarının daha çox hansı seqmentlərinə təsir edib?

- Dünya maliyyə böhranın əsasən banklar vasitəsi ilə satılan sığorta növlərinə təsiri hiss olunmaqdadır. Bu səbəbdən də böhranın Azərbaycanda daha çox təsir etdiyi sığorta növləri «Avtonəqliyyat vasitələrinin sığortası» və «Həyat sığortası» olub.

- Maliyyə Nazirliyinin Dövlət Sığorta Nəzarəti Xidməti tərəfindən sığortalıların hüquqlarının qorunması istiqamətində hazırlanan yeni qaydalar nə vaxt təsdiqlənəcək? Qaydalarla bağlı qısa məlumat verməyinizi istərdik.

- Azərbaycan Maliyyə Nazirliyinin Dövlət Sığorta Nəzarəti Xidməti tərəfindən sığorta ilə bağlı qanunvericilyin hazırlanması zamanı daim sığortalıların hüquqlarının müdafiəsi məsələsinə xüsusi diqqqət yetirilir və bu sahədə mütərəqqi beynəlxalq təcrübə öyrənilərək qeyd olunan məqsədlər üçün istifadə edilir. Məsələn, bu məqsədlə fiziki şəxslərin sahibliyində olan avtonəqliyyat vasitələrinin tam sığortası üzrə vahid sığorta qaydalarının layihəsi işlənib hazırlanıb. Hazırda bu layihə Azərbaycan Sığortaçılar Assosiasiyası ilə müzakirə olunur.

- Cari ilin əvvəlindən indiyə kimi sığorta ödənişi verməkdən yayınan şirkətlərlə bağlı Maliyyə Nazirliyinə daxil olan müraciətlərin sayı nə qədər olub və bu müraciətlər əsasında hansı tədbirlər görülüb?

- Artıq sona çatmaq üzrə olan 2009-cu il ərzində bununla bağlı Maliyyə Nazirliyinin Dövlət Sığorta Nəzarəti Xidmətinə təxminən 207 şikayət ərizəsi daxil olub. Əsaslı olan şikayət məkubları üzrə təxminən 80 min manat sığorta ödənişinin verilməsi ilə əlaqədar müvafiq sığortaçılara təqdimatlar göndərilib ki, bu da ötən illə müqayisədə 30 min manat çoxdur.

- Növbəti il ərzində Azərbaycanda yeni sığorta şirkətlərinin yaradılması ilə bağlı Nazirliyə müraciətlər daxil olubmu? Bu sahədə xarici investorların maraqları hansı səviyyədədir?

- Növbəti il ərzində yeni sığorta şirkətlərinin təsis edilməsi ilə bağlı Maliyyə Nazirliyinin Dövlət Sığorta Nəzarəti Xidmətinə müraciət daxil olmayıb.