Maliyyə

Ana səhifə

Maliyyə

Azərbaycanda QHT-lərin illik maliyyə hesabatının təqdim edilməsi qaydası təsdiqlənib

29 dekabr 2009 15:11 (UTC +04:00)

Bakı. Rəşad Süleymanov – APA-Economics. Azərbaycan Nazirlər Kabineti «Qeyri-hökumət təşkilatının illik maliyyə hesabatının forması, məzmunu və təqdim edilməsi Qaydası»nı təsdiq edib. Bu barədə «APA-Economics»ə Nazirlər Kabinetindən məlumat verilib.

Qaydalara əsasən, QHT-lər illik maliyyə hesabatlarını QHT-lər üçün Milli Mühasibat Uçotu Standartına uyğun tərtib etməlidir.

Nazirlər Kabinetinin qərarına əsasən, QHT-lərin maliyyə vəziyyəti haqqında hesabatına torpaq, tikili və avadanlıqlar, investisiya əmlakı, qeyri-maddi aktivlər, maliyyə aktivləri, mal-material ehtiyatları, qeyri-birja əməliyyatlarından əldə edilən daxilolmalar (üzvlük haqqı, ianələr və s.), birja əməliyyatlarından əldə edilən debitor borclar, pul vəsaitləri və onların ekvivalentləri, ödənilməli olan mənfəət vergisi, qeyri-birja əməliyyatları çərçivəsində kreditor borcları (vergilər və kreditor rüsumlardan fərqli olan), birja əməliyyatları çərçivəsində kreditor borcları, qiymətləndirilmiş öhdəliklər, maliyyə öhdəlikləri, xalis aktivlər (kapital) daxil edilib.

Maliyyə fəaliyyətinin nəticələri haqqında hesabata isə gəlir, xərclər, kommersiya fəaliyyəti üzrə mənfəət və ya zərər, kommersiya fəaliyyəti üzrə mənfəət vergisi, qeyri-kommersiya fəaliyyəti üzrə artıqlıq (profisit) və ya kəsir (defisit) daxil olunub.

Qərara əsasən, QHT illik maliyyə hesabatını müəyyən edilmiş müddətdə təqdim etmədikdə, Maliyyə Nazirliyi həmin təşkilata yazılı surətdə xəbərdarlıq etməklə müvafiq hesabatın 30 gün müddətində təqdim edilməsinə dair göstəriş verməli, əks halda isə maliyyə hesabatlarını təqdim etməyən qeyri-hökumət təşkilatları barədə Ədliyyə Nazirliyinə məlumat verməlidiir.

QHT-lərin illik maliyyə hesabatları üçün hesabat dövrü yanvar ayının 1-dən dekabr ayının 31-i də daxil olmaqla, il ərzində oktyabr ayının 1-dək yeni yaradılan QHT-lər üçün birinci hesabat dövrü onların qanunvericiliklə müəyyən edilmiş qaydada dövlət qeydiyyatına alındığı tarixdən dekabr ayının 31-i də daxil olmaqla, oktyabr ayının 1-dən sonra yeni yaradılmış QHT-lər üçün isə birinci hesabat dövrü onların qanunvericiliklə müəyyən edilmiş qaydada dövlət qeydiyyatına alındığı tarixdən növbəti ilin dekabr ayının 31-i də daxil olmaqla müəyyənləşdirilib.