Maliyyə

Ana səhifə

Maliyyə

«Azərbaycan Sənaye Sığorta» şirkəti bu il həyat sığortası üzrə şirkət yaratmayacaq

07 yanvar 2010 08:15 (UTC +04:00)

Bakı. Elnur Hüseynquluyev – APA-Economics. «Azərbaycan Sənaye Sığorta» şirkəti bu il ərzində həyat sığortası üzrə ixtisaslaşmış şirkət yaratmağı planlaşdırmır. Bunu «APA-Economics»ə şirkətin İdarə Heyətin sədr müavini Faiq Hüseynov bildirib.

F.Hüseynovun sözlərinə görə, ölkədə «Həyat sığortası» növü yüksək inkişaf etmədiyi üçün belə bir şirkətin yaradılmasına ehtiyac duyulmur: «Bu il ərzində bizim əsas planlarımız «Kasko» və «Əmlak sığortası» növlərini təkmilləşdirərək daha da inkişaf etdirməkdir».

F.Hüseynov qeyd edib ki, bu il ərzində şirkət tərəfindən yeni filial və nümayəndəliklərinin açılması da nəzərədə tutulmayıb.

Xatırladaq ki, təsisçisi «Azərbaycan Sənaye Bankı» olan «Azərbaycan Sənaye Sığorta» şirkəti 1996-cı ildən fəaliyyət göstərir. Yaxın vaxtlara kimi şirkət «Capital İnvestment Insurance» («CI Insurance») brendi ilə tanınıb. Cari ilin yanvar ayının 1-nə şirkətin nizamnamə kapitalı 4 mln. manat təşkil edib. Hazırda şirkət 22 könüllü və 4 icbari sığorta növü üzrə xidmət göstərir.