Maliyyə

Ana səhifə

Maliyyə

«AIG Caspian» sığorta şirkətinin ödənişləri ötən il 7 dəfə artıb

07 yanvar 2010 11:39 (UTC +04:00)

Bakı. Elnur Hüseynquluyev – APA-Economics. «American İnternational Group Caspian» (AIG Caspian) sığorta şirkətinin 2009-cu il ərzində topladığı sığorta haqlarınınn həcmi 1,652 mln. manat təşkil edib ki, bu da 2008-ci illə müqayisədə 1,66% çoxdur.

Şirkətin Maliyyə Departamentinin direktoru Elmar İslamın «APA-Economics»ə verdiyi məlumata görə, hesabat dövründə şirkətin sığorta riskləri üzrə ödənişlərinin həcmi 6,7 dəfə artaraq 1,188 mln. manata çatıb.

E.İslamın sözlərinə görə, bu müddət ərzində ən çox vəsait «Əmlakın yanğından və digər risklərdən sığortası» (803 min manat), «Ümumi mülki məsuliyyətin sığortası» (654 min manat) və «Maliyyə təşkilatlarının, korporasiyalarının risklərinin sığortası» (75 min manat) növləri üzrə toplanıb. Bu növlərin ümumi daxilolmalarda xüsusi çəkisi müvafiq olaraq 48,6%, 39,6% və 4,5% təşkil edib.

Ödənişlərə gəldikdə isə, ən çox vəsait «Ümumi mülki məsuliyyətin sığortası» (428 min manat) və «Əmlakın yanğından və digər risklərdən sığortası» (402 min manat) növləri üzrə ödənilib.

Xatırladaq ki, təsisçiləri yerli «Caravan İnvestment» şirkəti (51%) və «AIG İnc.» şirkəti (49%) olan «AIG Caspian» sığorta şirkəti Azərbaycanda 1999-cu ildən fəaliyyət göstərir. Cari ilin yanvar ayının 1-nə şirkətin nizamnamə kapitalı 3,5 mln. AZN təşkil edib. Şirkət yalnız könülü sığorta növləri üzrə xidmət göstərir.