Maliyyə

Ana səhifə

Maliyyə

Azərbaycan WOCCU-nun Las-Veqas konfransında iştirak edəcək

11 yanvar 2010 08:08 (UTC +04:00)

Bakı. Elnur Hüseynquluyev – APA-Economics. Azərbaycan Kredit İttifaqları Assosiasiyası (AKİA) 2010-cu ilin iyul ayının 14-17-də Ümumdünya Kredit İttifaqları Şurasının (WOCCU - World Council of Credit Unions) Las-Veqasda (ABŞ) keçiriləcək növbəti konfransında iştirak edəcək. Bunu «APA-Economics»ə açıqlamasında AKİA-nın İdarə Heyətinin sədri Elçin Bağırov bikldirib.

E.Bağırovun «APA-Economics»ə vediyi məlumata görə, toplantıda beynəlxalq quruma üzv olan kredit ittifaqlarının üzvlük məsələsi, 2009-cu il ərzində ittifaqlar tərəfindən görülmüş işlərin hesabatı, həmçinin üzv ölkələrdə kredit ittifaqları ilə bağlı qanunvercilik bazasında təkmilləşdirmə işləri, yoxsulluğun azadılması ilə bağlı həyata keçirilən layihələrin nəticəsi müzakirə ediləcək.

Qeyd edək ki, WOCCU-nun ötən il Barselonada keçirilən iclasından fərqli olaraq, növbəti iclasda E.Bağırovun müvafiq mövzu üzrə çıxışı nəzərdə tutulmayıb.

Xatırladaq ki, Azərbaycan 100 ölkənin üzv olduğu WOCCU təşkilatına 2009-cu ilin mart ayında qoşulub. Üzv təşkilatlar tərəfindən quruma illik 5 min ABŞ dolları həcmində üzvlük haqqı ödənilir. Lakin üzvlük haqqı AKİA üçün güzəştli şərtlərlə müəyyənləşdirilib. Belə ki, birinci il üçün 500 dollar ödəyən AKİA tərəfindən tədricən üzvlük haqqını hər il 500 dollar artırılmaqla 5 min dollara çatdıracaq.

WOCCU 1971-ci ildə təsis edilib, dünya üzrə ümumilikdə üzvlərinin 49 mindən çox kredit ittifaqı qurumun üzvüdür və onların 177 mln. səhmdarı var. Bu kredit ittifaqlarının aktivlərinin ümumi həcmi 1,181 trln. ABŞ dollarına bərabərdir. WOCCU-nun mənzil qərargahı Medisonda (ABŞ, Viskonsin ştatı) yerləşir.

Xatırladaq ki, AKİA 2003-cü ildən fəaliyyət göstərir. Azərbaycandakı 79 kredit ittifaqından 47-si qurumun üzvüdür. Assosiasiyanın üzvü olan kredit ittifaqlarının 35-i kənd təsərrüfatının kreditləşməsində iştirak edir. Quruma kredit ittifaqları tərəfindən ödənilən rüblük üzvlük haqqı 100 manat, yeni qəbul edilən ittifaqlar üçün isə 30 manat təşkil edir.