Maliyyə

Ana səhifə

Maliyyə

«CredAgro» təşkilatı AYİB-dən 6 mln. dollara yaxın kredit cəlb etmək istəyir

13 yanvar 2010 10:36 (UTC +04:00)

Bakı. Elnur Hüseynquluyev - APA-Economics. Azərbaycanda fəaliyyət göstərən ən iri qeyri-bank kredit təşkilatlarından olan «CredAgro» təşkilatı cari ilin birinci rübünün sonunadək Avropa Yenidənqurma və İnkişaf Bankından (AYİB) 3-6 mln. ABŞ dolları həcmində kredit cəlb edəcək. Bunu “APA-Economics”ə eksklüziv açıqlamasında təşkilatın direktoru Eldar Cəfərov bildirib.

E.Cəfərovun sözlərinə görə, kreditin cəlb edilməsi prosesinin tezləşdirilməsinə dair bu gün AYİB ilə bu istiqamətdə danışıqlar aparılacaq: «Ümumiyyətlə, bizim planlarımıza əsasən beynəlxalq maliyyə institutundan 3-6 mln. dollarlıq kredit cəlb etmək niyyətindəyik. Kreditin cəlb edilməsinə dair ilkin danışıqlar olub. Lakin dəqiq vəsaitin hansı həcmdə ayrılması məsələsi bu gün müzakirə ediləcək».

E.Cəfərov bildirib ki, təşkilatın apardığı siyasətə uyğun olaraq kreditlər ölkədə kiçik və orta sahibkarlığın inkişafına, həmçinin kiçik sahibkarlıqla bağlı olan layihələrin maliyyələşdirilməsinə sərf ediləcək.

Qeyd edək ki, imzalanacaq bu kredit müqaviləsi «CredAgro» təşkilatının AYİB ilə imzaladığı sayca üçüncü müqavilə olacaq.

Xatırladaq ki, təsisçisi ABŞ-ın ACDİ/VOCA təşkilatı olan «CredAgro» Azərbaycanda 2000-ci ildən fəaliyyət göstərir. Təşkilatın respublika üzrə 14 filialı və 8 köməkçi ofisi var. «CredAgro» təşkilatı kreditləri illik 25-36% dərəcəsi ilə ayırır.