Maliyyə

Ana səhifə

Maliyyə

«CredAgro» təşkilatı ötən il müştərilərinin sayını 51% artırıb

13 yanvar 2010 12:57 (UTC +04:00)

Bakı. Elnur Hüseynquluyev - APA-Economics. Azərbaycanda fəaliyyət göstərən ən iri qeyri-bank kredit təşkilatlarından olan «CredAgro» təşkilatının müştərilərinin sayı 2010-cu ilin yanvar ayının 1-nə 20,7 min nəfərə çatıb.

Təşkilatın direktoru Eldar Cəfərovun «APA-Economics»ə verdiyi məlumata görə, hesabat ilində yəni 2008-ci ilin yekunları ilə müqayisədə təşkilatın müştərilərinin sayı 51% artıb.

E.Cəfərov daha sonra təşkilatın 2010-cu ildə ölkə üzrə yeni nümayəndəlik və filiallarının açılması məsələsinə toxunub. O bildirib ki, planlara uyğun olaraq cari il üzrə Saatlı, İmişli və Dəvəçidə filial və nümayəndəliklərin açılması nəzərdə tutulub. «Lakin həmin rayonlarda filialın açılması ilə bağlı yerli araşdırmalar aparılır. Həmin rayonlarda potensial müştərilərin sayı təşkilatın tələblərinə uyğun olarsa filial, əks halda, nümayəndəliklər açılacaq», - deyə direktor qeyd edib.

Xatırladaq ki, təsisçisi ABŞ-ın ACDİ/VOCA təşkilatı olan «CredAgro» Azərbaycanda 2000-ci ildən fəaliyyət göstərir. Təşkilatın respublika üzrə 14 filialı və 8 köməkçi ofisi var. «CredAgro» təşkilatı kreditləri illik 25-36% dərəcəsi ilə ayırır.