Maliyyə

Ana səhifə

Maliyyə

«Günay Anadolu» sığorta şirkətinin daxilolmaları ötən il 33% azalıb

15 yanvar 2010 11:08 (UTC +04:00)

Bakı. Elnur Hüseynquluyev – APA-Economics. Azərbaycanın «Günay Anadolu» sığorta şirkətinin 2009-cu il ərzində topladığı sığorta haqlarının həcmi 1,529 mln. manat təşkil edib ki, bu da 2008-ci ilin yekunlari ilə müqayisədə 32,9% azdır.

Şirkfətdən «APA-Economics»ə verilən məlumata görə, hesabat ilində şirkətin sığorta riskləri üzrə ödənişləri 6,6% artaraq 181,214 min manata çatıb.

Ötən il ərzində şirkətin könüllü sığorta növləri üzrə daxilolmalarının həcmi 1,525 mln. manat, icbari sığorta növləri üzrə isə 3,792 min manat təşkil edib. Daxilolmaların strukturunda «Əmlakın yanğından və digər risklərdən sığortası» (1,161 mln. manat), «Avtonəqliyyat vasitlərinin sığortası» (216,397 min manat), «Ümumi mülki məsuliyyətin sığortası» (60,805 min manat) növləri liderlik edir.

Ödənişlərə gəldikdə isə, «Avtonəqliyyat vasitlərinin sığortası» (88,075 min manat) növü üzrə ödənişlər üstünlük təşkil edib. Sonrakı mövqelərə «Ümumi mülki məsuliyyətin sığortası» (37,902 min manat), «Tibbi sığorta» (24,014 min manat) və «Avtonəqliyyat vasitəsi sahiblərinin mülki məsuliyyətinin icbari sığortası» (15,779 min manat) növləri malikdir.

Qeyd edək ki, «Günay Anadolu» sığorta şirkəti 1992-ci ildən fəaliyyət göstərir. Şirkət əvvəllər xarici kapitallı yerli hüquqi şəxs formasında fəaliyyət göstərib. Belə ki, şirkətin nizamnamə kapitalının 51%-ni yerli, 49%-ni xarici kapital təşkil edib. Lakin nizamnamə kapitalına edilən dəyişikliyə əsasən, şirkət 100%-li yerli şirkətə çevrilib. Hazırda şirkətin səhmdarları sırasına «Günaybank» (34,62%) və iki yerli fiziki şəxs (65,38%) daxildir.
Hazırda şirkət 2 icbari və 18 könüllü sığorta növü üzrə xidmət göstərir.