Maliyyə

Ana səhifə

Maliyyə

Azərbaycanın gömrük orqanları ötən il 3 005 hüquqpozma faktı aşkar ediblər

16 yanvar 2010 10:53 (UTC +04:00)

Bakı. Rəşad Süleymanov-APA. Azərbaycanın gömrük orqanları tərəfindən 2009-cu ildə 3 005 hüquqpozma faktı aşkar edilib. Bu barədə APA-ya Dövlət Gömrük Komitəsindən məlumat verilib.

Bu faktlardan 162-i cinayət xarakterli olub və həmin faktlar üzrə tutulmuş qaçaqmalçılıq əşyalarının və digər predmetlərin dəyəri 688 686 manat təşkil edib. Cinayət əməllərinin törədilməsində təqsirli bilinən 160 nəfərin cinayət təqibi üzrə müvafiq tədbirlər görülüb.

Görülmüş tədbirlər nəticəsində ötən il ərzində narkotik vasitələrin qanunsuz dövriyyəsi ilə əlaqədar 65 fakt aşkar olunub. Bu faktlar üzrə 319 kq 907 qram narkotik, o cümlədən 208 kq 825 q həşiş, 61 kq 870 q heroin, 48 kq 885 q tiryək, 326,92 q marixuana, 1 kq 982 q psixotrop maddə (ampul, kapsul və həb şəklində), 1,65 q metadon, 10,819 q metamfetamin maddəsi tutulub. Bu faktlar üzrə 66 nəfəri kişi 15 nəfəri qadın olmaqla ümumilikdə 81 nəfər məsuliyyətə cəlb olunub. Narkotik vasitələrin qanunsuz dövriyyəsi ilə əlaqədar tutulan şəxslərin 39-u Azərbaycan, 17-si İran, 7-si Pakistan, 6-sı Rusiya, 4-ü Özbəkistan, 2-si Nigeriya, 2-si Türkiyə, 1-i Gürcüstan, 1-i Hindistan, 1-i Litva, 1-i Kamboca vətəndaşlarıdır.

Ötən il aşkar olunmuş faktların və əməliyyat məlumatlarının təhlili nəticəsində narkotik qaçaqmalçılarının ən çox İran-Azərbaycan-Rusiya və İran-Azərbaycan-Çin marşrutundan istifadəyə cəhd göstərdikləri, son illər mütəşəkkil cinayətkar dəstələr tərəfindən törədilən narkotik qaçaqmalçılıq hallarının çoxaldığı müəyyənləşib. Hesabat ilində narkotiklərin qanunsuz dövriyyəsi ilə məşğul olan 13 mütəşəkkil cinayətkar dəstə və narkoqrup aşkarlanaraq zərərsizləşdirilib. Belə ki, 8 may 2009-cu ildən 10 iyul 2009-cu ilə qədər olan dövrdə həyata keçirilmiş kompleks əməliyyat-axtarış və istintaq tədbirləri nəticəsində 6 transmilli mütəşəkkil cinayətkar dəstə ifşa olunub və onlardan 50 kq-dan artıq güclü təsirli narkotik vasitə olan heroin götürülüb.

Ötən il aşkar olunmuş 2843 gömrük qaydaları əleyhinə inzibati xəta faktları üzrə 596 hüquqi şəxs (o cümlədən 150 xarici hüquqi şəxs) və 2 238 fiziki şəxs (o cümlədən 887 xarici) inzibati məsuliyyətə cəlb edilib. Göstərilən şəxslərə qarşı 1 mln. 790 min manatdan çox cərimə, 750 215 manat dəyərində müsadirə tətbiq olunub. Miqdarına görə aşkar edilmiş inzibati xəta faktlarının ən çoxu - 346-sı malların və nəqliyyat vasitələrinin bəyan edilməməsi və ya düzgün bəyan edilməməsi ilə əlaqədar xətalardır.

Valyuta qanunvericiliyinin pozulmasına qarşı gömrük orqanları tərəfindən görülən tədbirlər nəticəsində 2009-cu ildə hüquqpozma predmeti kimi külçə və zinət əşyaları şəklində 3 kq 721 qram qızıl, 313 ədəd gümüş əşyalar, 236 000 ABŞ dolları tutulub.

Hesabat dövründə gömrük orqanları tərəfindən hüquqpozma predmeti kimi 1 ədəd "QLOK-19" tipli tapança və onun 31 ədəd 9 mm-lik patronu, 45 ədəd patron, 2 ədəd hərbi təyinatlı radiostansiya, 1 334 ədəd mobil telefon, 1 038 ədəd dini məzmunlu kitab, 6 695 ədəd DVD disk, 14 kq qara kürü, 500 litr neft məhsulu, 13,8 kq Ermənistan istehsalı olan və orqanizm üçün zərərli sayılan qəhvə tutulub.

Komitədən bildirilib ki, 2009-cu il ərzində DGK-nın Gömrük Sahəsində Hüquqpozmalara Qarşı Mübarizə Baş İdarəsi tərəfindən 8 cinayət və 8 inzibati xəta faktı üzrə müvafiq icraat və təhqiqat aparılıb. Hüquqpozma törətmiş şəxslərə 70 min manatdan çox cərimə və müsadirə tətbiq olunub, cərimələrin ödənilməsi təmin edilib.