Maliyyə

Ana səhifə

Maliyyə

«Fitch» agentliyi «AGBank»ın reytinq üzrə proqnozunu yüksəldib

09 fevral 2010 13:30 (UTC +04:00)

Bakı. Elnur Hüseynquluyev – APA-Economics. «Fitch» beynəlxalq reytinq agentliyi «AGBank»ın reytinqi üzrə proqnozunu neqativdən stabilə dəyişib.

«AGBank»ın baş ofisindən «APA-Economics»ə verilən məlumata görə, agentliyin bu proqnozu bankın aktivlərinin keyfiyyəti nəzərə alınaraq, mümkün risklərin ödənilməsi potensialını əks etdirir.

Eyni zamanda hesabatda bu proqnozla bankın xarici borclardan asılılığının aşağı səviyyəsi də qeyd edilib. Belə ki, 2009-cu ildə bir neçə iri xarici borclar üzrə bank öz öhdəliklərini vaxtında yerinə yetirdikdən sonra cari ilin əvvəlinə xarici borclar bankın öhdəliklərinin cəmi 8%-ni təşkil edib.

Bununla yanaşı, agentlik tərəfindən hesabat ili ərzində fiziki şəxslərin müddətli əmanətlərinin həcminin artımı və bankın bu sektorda ümumi bazar payının artımı da qeydə alınıb.

«AGBank»ın İnkişaf Departamentinin direktoru Əfqan Cəlilovun sözlərinə görə, «Fitch» beynəlxalq reytinq agentliyi «AGBank»ın reytinq üzrə proqnozunu «neqativ»dən «stabil»ə dəyişdirməsi nəticəsində bankın ümumi reytinqi «B-/stable/B» səviyyəsində təsdiqlənib.

Xatırladaq ki, 2009-cu il ərzində bankın aktivləri 13%-dən çox artaraq cari ilin əvvəlinə 240 mln. manata, kredit portfeli il ərzində 20,5% artaraq 188 mln. manata, fiziki şəxslərdən cəlb edilmiş müddətli əmanətlərin həcmi isə il ərzində 31% artaraq 82 mln. manata çatıb.