Maliyyə

Ana səhifə

Maliyyə

«Əmrah Sığorta» şirkətinin lisenziyası bərpa olunub

25 may 2010 11:25 (UTC +04:00)

Bakı. Elnur Hüseynquluyev – APA-Economics. Azərbaycan Maliyyə Nazirliyi may ayının 25-dən etibarən «Əmrah Sığorta» şirkətinin lisenziyasının qüvvəsini bərpa edib. Bunu «APA-Economics»ə açıqlamasında şirkətin İdarə Heyətinin sədr müavini Emil Ağasıyev bildirib.

E.Ağasıyevin sözlərinə görə, lisenziyanın qüvvəsinin dayandırılmasına əsas verən hallar aradan qaldırılıb və bununla da Maliyyə Nazirliyinin müvafiq əmri ilə lisezniya bərpa olunub.

E.Ağasıyev qeyd edib ki, şirkət Maliyyə Nazirliyinin lsenziyanın qüvvəsinin bərpası üçün təqdim etdiyi vaxtdan (6 ay) daha tez məcmu kapitalını 70% artıraraq 3,5 mln. manat çatdırıb: «Şirkətin lisenziyası məcmu kapitalın tələb olunan normadan aşağı olması ilə əlaqədar dayandırılmışdır. Biz şirkətin nizamnamə kapitalını səhmlərin nominal dəyərinin artırılması, eyni zamanda səhmdarlar tərəfindən əlavə vəsaitin cəlb olunması yolu ilə tələbnamədən də artıq həddə çatdırmışıq».

E.Ağasıyev bildirib ki, bundan sonra «Əmrah Sığorta» şirkəti yaxın perspektivdə yeni inkişaf və məhsulların tətbiqi ilə bağlı proqramlar həyata keçirəcək. «Yeni inkişaf proqramı çərçivəsində yaxın vaxtlarda şirkətdə yeni proqram təminatı tətbiq ediləcək. Bunula yanaşı, şirkətin rəsmi internet səhifəsi yaradılacaq. Həmin səhifə vasitəsilə sığorta məhsullarının on-line satışı və digər xidmətlərin təşkili nəzərdə tutulub. Ümumiyyətlə, bu gündən etibarən şirkət yeni bir inkişaf mərhələsinə qədəm qoyur», - deyə «Əmrah Sığorta»nın başçısı vurğulayıb.

Qeyd edək ki, bu ilin may ayının 7-dən etibarən Azərbaycan Maliyyə Nazirliyinin Dövlət Sığorta Nəzarəti Xidməti «Günay Sığorta» ASC, «Azal Sığorta» ASC və «Əmrah Sığorta» ASC-yə sığorta fəaliyyətinə verilən lisenziyaların qüvvəsini dayandırıb. Lisenziyanın dayandırlmasına əsas səbəb kimi həmin şirkətlərin maliyyə sabitliyi və ödəmə qabiliyyəti normativlərinə əməl olunmasının təmin edilməsi barədə dövlət sığorta nəzarəti orqanı tərəfindən verilən təqdimatları icra etməmələri göstərilir. Nazirlik həmin şirkətlərə maliyyə sabitliyi və ödəmə qabiliyyəti normativlərinə əməl olunmasının təmin edilməsi ilə bağlı 6 ay vaxt verib. Bu vaxt çərçivəsində normativlərə əməl etməyən şirkətlərin lisezniyaları ləğv ediləcək.

Xatırladaq ki, ölkədə fəaliyyət gösətən sığorta şirkətləri üçün minimum məcmu kapital tələbi 2010-cu il yanvar ayının 1-nə 2 mln. manat həcmində olmalıdır. Bu məbləğ 2011-ci il yanvarın 1-nə 3,5 mln. manata, 2012-ci il yanvarın 1-nə isə 5 mln. manata çatdırılmalıdır. Yeni yaradılan sığorta şirkətləri üçün minimum kapital tələbi isə 5 mln. manatdır.

Qeyd edək ki, təsisçisi 2 yerli fiziki şəxs olan «Əmrah Sığorta» şirkəti 1993-cü ildən fəaliyyət göstərir. Ötən il ərzində şirkətin topladığı sığorta haqlarının həcmi 260,9 min manat, ödənişləri isə 128,4 min manat olub.