Maliyyə

Ana səhifə

Maliyyə

Azərbaycanda nağdsız ödənişlərin inkişaf etdirilməsinə dair kompleks tədbirlər planı hazırlanır

26 may 2010 13:37 (UTC +04:00)

Bakı. Vahab Rzayev – APA-Economics. Bu gün Bakıda «Visa» beynəlxalq ödəniş sistemi və Azərbaycan Mərkəzi Bankının təşkilatçılığı ilə ölkədə ticarət ekvayrinqinin inkişafına dair dəyirmi masa keçirilib. «Visa»dan «APA-Economics»ə verilən məlumata görə, toplantıda İqtisadi İnkişaf, Maliyyə, Rabitə və İnformasiya Texnoloqiyaları, Vergilər nazirlikləri, Dövlət Gömrük Komitəsi, Azərbaycan Sahibkarlar Konfederasiyası və kommersiya banklarının nümayəndələri iştirak ediblər.

Dəyirmi masanın gedişi zamanı ölkə iqtisadiyyatı və maliyyə sistemində nağdsız ödənişlərin rolu barədə aktual məsələlər müzakirə olunub. «Visa»nın Rusiya, MDB və Cənub-Şərqi Avropa ölkələri üzrə baş direktor Stiven Parker «Moody’s Economy» şirkətinin apardığı araşdırmanın nəticələri barədə danışarkən qeyd edib ki, ödəmə kartlarının istifadəsinin cəmi 1% artması ÜDM-in 0,024%-lik əlavə artımını təmin edir. Ümumulikdə, 2003-2008-ci illərdə ödəmə kartlarının istifadəsi araşdırılan 51 ölkədə məcmu olaraq 1,1 trln. dollar həcmində istehlakın və ÜDM-in artımına səbəb olub.

Azərbaycanda 16 bank-ekvayr arasında keçirilmiş sorğu nəticəsində məlum olub ki, bankirlərin 84%-i ticarət ekvayrinqinin inkişafını saxlayan hüquqi xarakterli amillərin Ən əsasının ticarət nöqtələrində kartların qəbulu qaydaları üzrə nəzarətin aparılmaması amilini qeyd edib. Təşkilati xarakterli mənfi amillər sırasında istehlakçılar arasında kartın nağdsız ödəmə vasitəsi kimi əsas funksiyası barədə kifayət qədər məlumatlı olmaması da qeyd olunur.

Dəyirmi masada aparılan müzakirələrin nəticəsində qətnamə qəbul olunub. Həmin sənəd bir sıra mühüm məsələləri və əldə edilmiş razılaşmaları əks etdirir. Belə ki, sənədə ticarət ekvayrinqinin inkişafına dair illik forumun keçirilməsi, Mərkəzi Bank, Vergilər Nazirliyi, Sahibkarlar Konfederasiyası, banklar və «Visa»nın nümayyəndələrinin iştirakı ilə Təşkilat Komitəsinin yaradılması, ticarət ekvayrinqi və kart ödənişləri sahəsində aktual məsələlərin tənzimlənməsi üçün müvafiq dövlət orqanlarına kollektiv müraciətin göndərilməsi, banklar, ticarət və xidmət müəssislərinin əməkdaşlarının təlim və peşəkar hazırlıq səviyyəsinin artırılması üçün tədbirlərin keçirilməsi kimi məsələlər daxil edilib.