Maliyyə

Ana səhifə

Maliyyə

«Fitch Ratings» agentliyi «AccessBank»ın reytinqini təsdiqləyib

31 may 2010 07:56 (UTC +04:00)

Bakı. Elnur Hüseynquluyev – APA-Economics. «Fitch Ratings» beynəlxalq reytinq agentliyi «AccessBank» QSC-nin fərdi reytinqini «D», emitentin defoltu üzrə uzunmüddətli və qısamüddətli reytinləri isə «BB+» və «B» səviyyəsində təsdiq edib.

Bankın baş ofisindən «APA-Economics»ə verilən məlumata görə, reytinqlərin təsdiglənməsi ilə «AccessBank» Azərbaycanda ən yüksək reytinqə malik olan maliyyə institutu olaraq qalıb. «Fitch» həmçinin, emitentin defoltu üzrə uzunmüddətli reytinqi III dərəcəli yardımçı reytinqlə, «sabit» səviyyəsində təsdiqləyib. «AccessBank»ın reytinginin təsdiglənməsi «Fitch Ratings» agentliyinin bu ilin may ayının 20-də ölkə reytinqinə yenidən baxması və bu reytinqin «BB+» səviyyəsindən «BBB-» həddinədək yüksəlməsi ilə müşaiyət olunub.

«AccessBank»ın fərdi reytinqi «Fitch» tərəfindən qiymətləndirilmiş Azərbaycan bankları arasında ən yüksək reytinq hesab olunur və bu reytinq risklərin yüksək səviyyədə idarə olunduğunu, yüksək mənfəətlilik və sabit kapitallaşma səviyyəsini əks etdirir.

Bankın İdarə Heyətinin sədri Endrü Pospielovskinin sözlərinə görə, «Fitch Ratings» agentliyi tərəfindən «AccessBank»ın reytinqinin Azərbaycanın özəl bankları arasında ən yüksək səviyyədə təkrar təsdiqlənməsi bankın sabitliyi və gücünü göstərir.

Xatırladaq ki, «AccessBank» QSC 2002-ci ilin oktyabr ayında Azərbaycan Mikromaliyyələşdirmə Bankı kimi fəaliyyətə başlayıb və 2008-ci ilin sentyabr ayında brendini dəyişib. Bankın təsisçiləri rolunda Avropa Yenidənqurma və İnkişaf Bankı (20%), Beynəlxalq Maliyyə Korporasiyası (20%), Qara Dəniz Ticarət və İnkişaf Bankı (20%), Almaniyanın KfW Bankı (20%), «AccessHolding» (16,53%) və «LFS Financial Systems GmbH.» şirkəti (3,47%) çıxış edir. Bankın ölkə üzrə 23 filialı, 23 bankomatı və 48 POS-terminalı fəaliyyət göstərir.