Maliyyə

Ana səhifə

Maliyyə

Azərbaycanda bu ilin yanvar-iyul aylarında 88,6 mln. manat sığorta haqqı toplanıb

19 avqust 2010 11:09 (UTC +04:00)

Bakı. Elnur Hüseynquluyev – APA-Economics. Cari ilin yanvar-iyul aylarında Azərbaycanda fəaliyyət göstərən sığorta təşkilatları tərəfindən toplanan sığorta haqlarının həcmi 88,562 mln. manat təşkil edib.

Maliyyə Nazirliyindən «APA-Economics»ə verilən məlumata görə, hesabat dövründə həyata keçirilən sığorta ödənişlərinin ümumi həcmi 26,815 mln. manat olub.

Bu müddət ərzində həyat sığortası üzrə daxilolmaların həcmi 0,853 mln. manat, qeyri-həyat sığortası üzrə 69,806 mln. manat, icbari sığorta növləri üzrə isə 17,902 mln. manat təşkil edib. Ödənişlərə gəldikdə isə, həyat sığortası üzrə 0,219 mln. manat, qeyri-həyat sığortası üzrə 21,792 mln. manat, icbari sığorta növləri üzrə isə 4,803 mln. manat həcmində ödəniş aparılıb.

Bundan başqa, daxilolmaların strukturunda ən çox sığorta haqqı «Avtonəqliyyat vasitələrinin sığortası» (18,682 mln. manat), «Tibbi sığorta» (15,609 mln. manat), «Əmlakın yanğından və digər risklərdən sığortası» (10,179 mln. manat), «Hərbi qulluqçuların dövlət icbari şəxsi sığortası» (7,919 mln. manat) və «Hava nəqliyyatı vasitələrinin sığortası» (7,483 mln. manat) növləri üzrə toplanıb. Bu növlərin məcmu sığorta haqlarında payı müvafiq olaraq 21,1%, 17,6%, 11,5%, 9% və 8,5% təşkil edib.

Ödənişlərdə isə ən çox vəsait «Tibbi sığorta» (9,939 mln. manat və ya 37,1%), «Avtonəqliyyat vasitələrinin sığortası» (8,337 mln. manat və ya 31%) və «Hərbi qulluqçuların dövlət icbari şəxsi sığortası» (3,877 mln. manat və ya 14,5%) növləri üzrə ödənilib.

Qeyd edək ki, Azərbaycanda 27 sığorta təşkilatı («Günay Sığorta» şirkətinin lisenziyasının qüvvəsi dayandırılıb) fəaliyyət göstərir.