Maliyyə

Ana səhifə

Maliyyə

«Zamin Bank» son bir ildə aktivlərini 33% artırıb

20 avqust 2010 14:30 (UTC +04:00)

Bakı. Elnur Hüseynquluyev – APA-Economics. Azərbaycanın «Zamin Bank» ASC-nin aktivlərinin həcmi 2010-cu ilin iyul ayının 1-nə 199,318 mln. manat təşkil edib ki, bu da ötən ilin iyul ayının 1-nə olan göstəricidən 33% çoxdur.

Bankın baş ofisindən «APA-Economics»ə verilən məlumata görə, hesabat dövründə bankın depozit portfeli 15,3% artaraq 38,253 mln. manata, o cümlədən əhalinin əmanətləri 35,759 mln. manata çatıb. Hesabat dövründə bankın kredit portfeli 53% artaraq 135,892 mln. manat, o cümlədən istehlak kreditlərinin həcmi 2,3 dəfə artaraq 35,262 mln. manat olub.

Bankdan bildirilib ki, bu müddət ərzində bankın məcmu kapitalı 32,3% artaraq 18,719 mln. manata, o cümlədən nizamnamə kapitalı 18% artaraq 13,195 mln. manata çatıb.

Qeyd edək ki, son bir ildə bankın ümumi gəlirləri 46% artaraq 9,692 mln. manat, xərcləri isə 65% artaraq 9,123 mln. manat olub. Nəticədə, bankın mənfəəti 48% azalaraq 0,568 mln. manat təşkil edib.

Bundan başqa, bu dövrdə bank tərəfindən əlavə 5 filial açılıb, həmçinin 9 bankomat və 15 POS-terminal quraşdırılıb.

Xatırladaq ki, «Zamin Bank» ASC 1992-ci ilin noyabrında yaradılıb. Bankın ölkə üzrə 35 filialı, həmçinin 6 şöbəsi, Rusiyada «Moskva» nümayəndəliyi, 34 bankomatı və 1 891 POS-terminalı fəaliyyət göstərir.