Maliyyə

Ana səhifə

Maliyyə

Azərbaycanda istehsalatda bədbəxt hadisələr nəticəsində peşə əmək qabiliyyətini itirənlərə sığorta ödənişi verilməsi qaydaları təsdiqlənib

04 noyabr 2010 15:16 (UTC +04:00)

Bakı. Əli Əhmədov – APA-Economics. Azərbaycan Nazirlər Kabineti «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə sığorta ödənişinin təyin edilməsi üçün sənədlərin Siyahısı» və «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə sığorta ödənişinin təyin edilməsi, verilməsinin dayandırılması və bərpa olunması Qaydaları»nı təsdiqləyib.

«APA-Economics»in məlumatına görə, bununla bağlı verilən qərara əsasən, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi zamanı aylıq və ya birdəfəlik sığorta ödənişləri üçün icbari sığorta müqaviləsi, sığorta olunanın və ya digər faydalanan şəxsin imzaladığı sığorta tələbi, istehsalatda bədbəxt hadisə haqqında akt, məhkəmə qərarının surəti, hadisə nəticəsində sığorta olunanın peşə əmək qabiliyyətini itirməsi haqqında Tibbi Sosial Ekspert Komissiyası tərəfindən verilən şəhadətnamənin surəti, sığorta olunan öldüyü halda, ölüm haqqında şəhadətnamənin notarial təsdiq edilmiş surəti və onun himayəsində olmuş ailə üzvləri haqqında arayış, eləcə də sığorta olunanın və ya faydalanan şəxsin şəxsiyyət vəsiqəsinin notarial qaydada təsdiq edilmiş surəti tələb olunacaq.

Sığorta olunana əlavə sığorta ödənişinin təyin edilməsi üçün yuxarıda sadalanan sənədlərlə yanaşı, sığorta olunanın həmin ödənişə aid yardım və qulluq növlərinə möhtac olması və bunları pulsuz almaq hüququnun qanunvericilikdə nəzərdə tutulmaması ilə bağlı Tibbi Sosial Ekspert Komissiyasının qərarının surəti də tələb olunur.
Annuitet müqaviləsi üzrə sığorta ödənişlərinin təyin edilməsi həmin müqavilə əsasında həyata keçirilir.

Nazirlər Kabinetinin qərarına əsasən, sığorta hadisəsinin baş verməsi barədə məlumat almış sığortaçı (sığorta şirkəti) sığorta tələbinin təqdim edilməsi üçün faydalanan şəxsi sığorta tələbi üzrə sorğu vərəqəsi ilə təmin etməli və lazım olduqda, həmin vərəqənin doldurulması üçün ona kömək etməlidir.

Bu qərarla təsdiqlənmiş «İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta üzrə sığorta ödənişinin təyin edilməsi, verilməsinin dayandırılması və bərpa olunması Qaydaları»na əsasən, aylıq sığorta ödənişləri - sığorta olunanın əvvəlki peşə əmək qabiliyyətinin itirilməsi dərəcəsinin TSEK tərəfindən müəyyən edildiyi tarixdən hesablanmaqla, sığorta ödənişinin verildiyi hər təqvim ayının 25-dən gec olmayaraq, birdəfəlik sığorta ödənişi - sığorta ödənişinin təyin edildiyi tarixdən 3 iş günü müddətində, əlavə sığorta ödənişi - TSEK-in müvafiq qərarı ilə təyin edildiyi tarixdən həmin qərarla müəyyən edilmiş müddətdə ödənilməlidir.

Aylıq sığorta ödənişi alan şəxs öldükdə, onun əmək qabiliyyəti bərpa olunduqda (bu, TSEK tərəfindən təsdiqlənməlidir) və ya təkrar müayinədən keçməkdən imtina etdikdə ona verilən aylıq sığorta ödənişi dayandırılır. Bu əsaslar aradan qalxdığı tarixdən aylıq sığorta ödənişinin verilməsi bərpa edilir.

Əgər aylıq sığorta ödənişi alan şəxs məhz həmin sığorta hadisəsinin səbəb olduğu haldan ölsə, onun yaxınlarına birdəfəlik sığorta ödənişi verilir. Bu o halarda mümkündür ki, sığorta olunanın himayəsində olmuş və ya onun öldüyü günədək ondan dolanacaq təminatı almaq hüququna malik olmuş əmək qabiliyyəti olmayan şəxslər olsun, sığorta olunanın ölümündən sonra uşağı doğulsun, sığorta olunanın himayəsində olmuş və onun 14 yaşına çatmamış, yaxud bu yaşa çatsa da, tibb orqanlarının rəyinə əsasən sağlamlıq vəziyyətinə görə başqasının qulluğuna ehtiyacı olan uşaqlarına, nəvələrinə, qardaşlarına və bacılarına qulluq etməklə məşğul olan və əmək qabiliyyətindən asılı olmayaraq, işləməyən valideynlərdən biri, arvad (ər) və ya digər ailə üzvü olsun, sığorta olunanın himayəsində olmuş və onun ölümündən sonra 5 il ərzində əmək qabiliyyətini itirmiş şəxslər olsun.