Maliyyə

Ana səhifə

Maliyyə

Azərbaycanın iqtisadi inkişaf naziri Özbəkistanın baş naziri ilə görüşüb

05 noyabr 2010 14:20 (UTC +04:00)

«APA-Economics»in məlumatına görə, görüş zamanı tərəflər arasında mövcud siyasi və iqtisadi əməkdaşlıq, əlaqələrin inkişaf perspektivləri və digər məsələlər müzakirə olunub. Görüşdə qeyd olunub ki, Daşkənddə keçirilən Azərbaycanın ilk Milli Sərgisi tərəflər arasında sözügedən əməkdaşlığın inkişafına təkan verəcək.
Qeyd edək ki, bu gün işə başlayan və noyabrın 8-dək davam edəcək Azərbaycanın Milli Sərgisi 4 550 kv. metr sahəni əhatə edir. Tədbirdə Azərbaycan tərəfindən dövlət rəsmiləri və 170-ə yaxın müəssisə və təşkilatın nümayəndələri iştirak edir. Sərgidə Azərbaycanın sosial-iqtisadi inkişafı, sənaye, yanacaq, energetika, rabitə və informasiya texnologiyaları, nəqliyyat, aqrar, ekologiya, turizm, mədəniyyət, xalq sənətkarlığı, səhiyyə, təhsil, idman və digər sosial sahələrdə əldə edilmiş nailiyyətləri əks etdirən göstəricilər, eləcə də Azərbaycanda istehsal olunan 1 700-ə yaxın çeşiddə müxtəlif məhsullar nümayiş olunur. Azərbaycan mənşəli məhsulların Mərkəzi Asiya bazarına ixracının genişləndirilməsinin təşviq olunması məqsədilə tədbir çərçivəsində sahibkarlar arasında ikitərəfli işgüzar görüşlərin keçirilməsi nəzərdə tutulub.
Sərgi çərçivəsində həmçinin, bir sıra mədəni tədbirlərin keçirilməsi planlaşdırılır, iştirakçılara Azərbaycan haqqında müxtəlif çap materialları, jurnallar, broşurlar, disk və digər təşviqat materialları paylanacaq.
Xatırladaq ki, Azərbaycanın Milli Sərgisi xarici ölkədə ilk dəfə keçirilir.