Maliyyə

Ana səhifə

Maliyyə

«Ansar Leasing» şirkətinin portfeli son bir ildə 30 dəfə artıb

08 noyabr 2010 10:37 (UTC +04:00)

Bakı. Elnur Hüseynquluyev – APA-Economics. Azərbaycanda İslam İnkişaf Korporasiyasının (ICD) təsisçiliyi ilə yaradılan «Ansar Leasing» şirkətinin portfelinin həcmi 2010-cu il noyabr ayının 1-nə 6 mln. ABŞ dolları təşkil edib ki, bu da ötən ilin analoji dövrünün eyni göstəricisi ilə müqayisədə 30 dəfə çoxdur. Bunu «APA-Economics»ə açıqlamasında şirkətin baş meneceri Ceyhun Nağıyev bildirib.

C.Nağıyevin sözlərinə görə, şirkət lizinq obyektlərinin maliyyələşdirilməsinə ötən ilin oktyabr ayında başlayıb və indiyədək müştərilərə dəyəri 7,5 mln. dollarlıq lizinq avadanlığı verib ki, bu da ötən ilin noyabrın 1-i ilə müqayisədə 27 dəfə çoxdur. Həmçinin, bağlanan lizinq müqavilələrinin sayı bu müddətdə 31 dəfə artaraq 125-ə çatıb.

C.Nağıyev bildirib ki, bütün layihələr islam prinsiplərinə uyğun maliyyələşdirilir. Portfeldə kənd təsərrüfatı sektoruna aid 100 min dollarlıq avadanlıq verilib ki, bunun da 75 min dolları (bu, məcmu portfelin 1,2%-ni təşkil edir) «Ansar Leasing» şirkəti tərəfindən maliyyələşib.

Şirkətin lizinq portfelində 45% ictimai nəqliyyat (kommersiya avtomobilləri), 40% tikinti sektoru, 15% isə istehlak təyinatlı minik avtomobillərinin payına düşür.

Qeyd edək ki, «Ansar Leasing» şirkəti dövlət qeydiyyatına 2008-ci ilin dekabr ayının 12-də alınıb və şirkətin nizamnamə kapitalı 5 mln. manat təşkil edir. Şirkət əsasən maliyyə lizinqi xidmətlərinin göstərilməsi ilə məşğuldur və fəaliyyəti şəriət qaydalarına əsaslanır.

Şirkətin maliyyələşdirmə şərtlərinə əsasən, lizinqin alınması üçün ilkin ödəniş 20% olmalıdır, maliyyələşdirmə müddəti isə 12-72 ay ola bilər. Şirkət bir layihə üçün maksimum 150 min dollar vəsait ayırır.