Maliyyə

Ana səhifə

Maliyyə

«Bank of Baku» yeni kredit kampaniyasına başlayıb

01 dekabr 2011 12:52 (UTC +04:00)

Bakı. Elnur Hüseynquluyev – APA-Economics. Azərbaycanın «Bank of Baku» ASC yeni il öncəsi yeni kredit kampaniyasına başlayıb.

Bankın baş ofisindən «APA-Economics»ə verilən məlumata görə, yeni kampaniyanın şərtlərinə əsasən, bank kampaniya müddətində bütün pul və istehlak kreditləri üzrə illik faiz dərəcələrində -2% bayram endirimi elan olunur (ipoteka kreditləri, avtokreditlər, təhsil krediti, faizsiz kreditlər, həmçinin əmanətə bağlı kreditlər istisna olmaqla). Üstəlik, nağd pul kreditinin maksimal məbləği artırılaraq 5 min manata çatdırılıb (müştəriyə ayrılan kreditin maksimal məbləği müştərinin vəzifəsindən, bankda olan kredit tarixçəsindən asılı olaraq bank eksperti tərəfindən təhlil olunduqdan sonra müəyyən olunacaq).

Eyni zamanda, kampaniya çərçivəsində bank yeni il öncəsi «20,12%» adlı yeni nağd pul krediti məhsulundan faydalanmaq imkanı da yaradıb. Yeni nağd pul kreditinin əsas üstünlüklərindən biri krediti dekabr ayında alıb, ödəməyə yanvar ayında deyil, fevral ayında başlamaq imkanının olmasıdır. Beləliklə, kreditin müddəti 13 ay, məbləği isə qalan 12 ay ərzində bərabər hissələrlə ödəmək olar və ümumilikdə, 13 aya çəkilən cəmi xərc isə məbləğin 20,12%-ni təşkil edir. Kreditin maksimal məbləği 5 min manatdır.

Qeyd edək ki, bankda istənilən krediti olan müştərilər paralel olaraq bu kreditdən də faydalana bilərlər. Yeni kampaniya dekabr ayının 30-dək davam edəcək.

Xatırladaq ki, «Bank of Baku» ASC 1994-cü ilin fevral ayında «Tuqay Bank» adı ilə fəaliyyətə başlayıb. Bankın təsisçiləri rolunda Türkiyənin «NAB Dış Ticarət» şirkəti və bir neçə fiziki şəxs çıxış edir.