Maliyyə

Ana səhifə

Maliyyə

Azərbaycan Vergi Məcəlləsinin təkmilləşdirilməsi ilə bağlı işlərə başlayıb

09 fevral 2012 09:28 (UTC +04:00)

«APA-Economics»in xəbərinə görə, bu barədə vergilər naziri Fazil Məmmədov bu gün «Azərbaycanda vergi sistemi: reallıqlar və perspektivlər» mövzusunda Bakıda keçirilən ilk Vergi Forumundakı çıxışında bildirib.

Onun sözlərinə görə, Azərbaycan iqtisadiyyatının yeni mərhələyə qədəm qoyması ilə vergi orqanları qarşısında duran vəzifələrdən biri də vergi sisteminin stabil və proqnozlaşdırıla bilən olmasıdır: «Bu baxımdan, qarşımızda duran mühüm məsələlərdən biri vergi qanunvericiliyinin təkmilləşdirilməsi prosesinin əsasən başa çatdırılmasıdır. Vergi Məcəlləsinin qəbul olunmasından 11 il ötüb. Qanunvericilik bu müddət ərzində xeyli təkmilləşdirilsə də, hesab edirik ki, iqtisadi inkişafın sürətlə davam etməsi fonunda və yeni iqtisadi münasibətlər kontekstində biz vergi qanunvericiliyini bir daha nəzərdən keçirməliyik».

Nazir bildirib ki, artıq aidiyyəti dövlət qurumlarının, biznes nümayəndələrinin və vergi sahəsində ölkənin aparıcı mütəxəssislərinin də iştirakı ilə yanvar-fevral aylarında Vergi Məcəlləsinin geniş müzakirəsinə başlanılıb: «Hesab edirik ki, işgüzar dairələrlə və ictimai təşkilatlarla daha sıx işləməklə, vergi qanunvericiliyinin təkmilləşdirilməsi prosesində onların təkliflərini öyrənməklə orta perspektiv üçün vergi qanunvericiliyi bazasında müvafiq dəyişikliklər edəcəyik».