Maliyyə

Ana səhifə

Maliyyə

Azərbaycanın vergilər naziri Fazil Məmmədov: «Nağdsız ödənişlərin artması vergitutma bazasının genişlənməsi üçün mühüm mənbələrdən biridir»

09 fevral 2012 09:38 (UTC +04:00)

Bakı. Əli Əhmədov - APA-Economics. Azərbaycan Vergilər Nazirliyi iqtisadiyyatın strukturunun formalaşmasında, innovasiyaların dəstəklənməsi siyasətində vergi sisteminin stimullaşdırıcı rolunu artırmağa çalışır. «APA-Economics»in xəbərinə görə, bunu vergilər naziri Fazil Məmmədov bildirib.

Onun sözlərinə görə, dövlət başçısının tapşırığı ilə yaxın illərdə büdcənin cari xərcləri əsasən vergi daxilolmaları hesabına ödənilməli, Dövlət Neft Fondundan transferlər isə yalnız irimiqyaslı investisiya layihələrinə yönəldilməlidir: «Bunun üçün biz dövlət büdcəsinin gəlirlərinin ciddi artımına nail olmalıyıq. Lakin bu, vergi yükünün artması hesabına deyil, iqtisadi artım templərinin yüksəldilməsi, vergi inzibatçılığı və sahibkarlarla tərəfdaşlıq münasibətlərinin, eləcə də vergi nəzarətinin gücləndirilməsi nəticəsində vergitutma bazasının genişləndirilməsi hesabına olmalıdır».

Nazir bildirib ki, Azərbaycanda hələ vergilərə cəlb edilməli geniş potensial mövcuddur. Belə ki, hazırda Vergilər Nazirliyi transfer qiymətlərinin formalaşması kimi həssas bir sahə üzərində vergi nəzarətinin tətbiqi istiqamətində araşdırmalara başlayıb: «Biz Mərkəzi Bankla birlikdə nağdsız ödəmələrin genişləndirilməsi prosesini də diqqətlə izləyir və öz səlahiyyətlərimiz çərçivəsində bu prosesə dəstək veririk. Nağdsız ödənişlərin həcminin artırılması vergitutma bazasının ciddi şəkildə genişlənməsi üçün mühüm mənbələrdən biridir və Azərbaycanda bu sahə yaxın zamanlarda qabaqcıl Avropa ölkələrində mövcud olan səviyyəyə çatdırılmalıdır».

Hazırda Vergilər Nazirliyi vergitutma bazasının genişləndirilməsi, vergilərdən yayınma hallarının minimuma endirilməsi məqsədilə vergi nəzarətinin müasir texnologiyalarının tətbiqi layihəsi üzərində çalışır. Ötən il vergi sistemində çox böyük bir layihənin icrasına başlanıb. Bu, Avropa İttifaqının Qonşuluq Siyasəti çərçivəsində «Kompyuter əsaslı audit sistemi sahəsində Azərbaycan Respublikası Vergilər Nazirliyinə dəstəyin göstərilməsi» tvinninq-layihəsidir. Yaxın gələcək üçün çox böyük perspektivlərə malik olan bu layihə ölkədə vergi auditi sahəsində inzibatçılığın ən yüksək beynəlxalq standartlara uyğunlaşdırılmasını nəzərdə tutur.