Maliyyə

Ana səhifə

Maliyyə

Azərbaycanda qeyri-dövlət sektorundan vergi daxilolmaları 40% artıb

13 fevral 2012 12:06 (UTC +04:00)

Bakı. Əli Əhmədov - APA-Economics. Ötən il Vergilər Nazirliyi tərəfindən büdcəyə 5 mlrd. 160 mln. manat proqnoza qarşı 5 mlrd. 475,1 mln. manat vəsait keçirilərək proqnoza 106,1% əməl edilib. Vergilər Nazirliyindən “APA-Economics”ə verilən məlumata görə, 2011-ci ildə vergi daxilolmaları 2010-cu ilə nisbətən 1 mlrd. 182,3 mln. manat və ya 27,5% çox olub.

Ötən il toplanılan vergilərin 1 mlrd. 657,4 mln. manatı və ya 30,3%-i dövlət sektoruna, 3 mlrd. 817,6 mln. manatı və ya 69,7%-i isə qeyri-dövlət sektoruna aid olub. Qeyri-dövlət sektoru üzrə daxilolmaların həcmi 2010-cu ilə nisbətən 40,5% (1 mlrd. 100,8 mln. manat) artıb. Nəticədə qeyri-dövlət sektorunun vergi daxilolmalarında xüsusi çəkisi 2010-cu ilə nisbətən 63,3%-dən 69,7%-ə yüksəlib. «Bu da ilk növbədə qeyri-dövlət sektorunda iqtisadi aktivliyin artmasının, real sektorun dəstəklənməsi siyasətinin tərkib hissəsi kimi azad rəqabətin təmin olunması və iqtisadiyyatın şaxələndirilməsi tədbirlərinin real nəticəsidir» - deyə məlumatda bildirilir.

İl ərzində podratçı şirkətlər tərəfindən büdcəyə 1 mlrd. 340,3 mln. manat mənfəət vergisi ödənilib. Podratçı şirkətlərin mənfəət vergisi istisna olunmaqla qeyri-dövlət sektoru üzrə daxilolmalar 2010-cu illə müqayisədə 25,4% və ya 501,5 mln. manat çox təşkil edib.

2011-ci ildə qeyri neft-qaz sektoru üzrə büdcəyə 2010-cu ilə nisbətən 518,4 mln. manat və ya 22,0% çox vəsait daxil olub. ARDNŞ-ın vergiləri, neft konsorsiumlarının ödədiyi mənfəət vergisi və subpodratçıların ödədiyi vergilər, habelə dövlət sektorunun ödədiyi vergilər nəzərə alınmadan qeyri neft-qaz sektorunda fəaliyyət göstərən və qeyri-dövlət sektorunu təmsil edən vergi ödəyicilərindən 2011-ci il ərzində büdcəyə 1 mlrd. 663,6 mln. manat vəsait daxil olub ki, bu da 2010-cu illə müqayisədə daxil olmuş vəsaitdən (1 mlrd. 292,4 mln. manat) 371,2 mln. manat və ya 28,7% çoxdur.