MDB

Ana səhifə

MDB

Ermənistanda baş vermiş silahlı insidentin təfərrüatları məlum olub - YENİLƏNİB

29 aprel 2020 08:20 (UTC +04:00)

Ermənistanın Qavar şəhərində baş vermiş silahlı insident nəticəsində iki nəfərin öldürülməsindən sonra şəhərdə vəziyyət kəskin şəkildə pisləşib.

APA xəbər verir ki, bu barədə "NEWS.am" məlumat yayıb.

Bildirilir ki, öldürülənlərdən biri, hərbi polisin müstəntiqinin qohumları yerli xəstəxanaya gəliblər və insident zamanı yaralanmış şəxslərin - Armen və Xaçik qardaşlarının boğazını kəsərək qətlə yetiriblər.

İnsidentin araşdırılması üçün Qavar şəhərinə İrəvandan işçi qrup və xüsusi təyinatlı dəstə göndərilib. Nəzarətdən çıxmış vəziyyətin idarə edilməsi üçün polis rəisi Arman Sarkisyan da Qavara gedib.

Məlumata görə, xəstəxanada vəziyyət qarışdığından istintaqçılar da ora yaxınlaşa bilmir. Atışma zamanı yaralananlardan birinin cərrahi əməliyyat olunduğuna dair məlumat da var, digər yaralı isə ağır vəziyyətdə İrəvana aparılıb.

Hadisə barədə bəzi təfərrüatlar da məlum olub. Silahlı insident zamanı ölənlərdən biri Qavarın Noratus kəndinin "Noratus ayısı" birliyinin üzvüdür, digəri isə hərbi polisin müstəntiqidir. Hadisə şahidlərinin bildirdiyinə görə, Qavardan və Noratus birliyindən olan yeniyetmələr mübahisə ediblər. Bu vaxt hərbi polisin müstəntiqi Zorik Paronikyan vəziyyətə müdaxilə edib, nəticədə atışma baş verib. Qeyd edilir ki, hətta ölən şəxsləri iki avtomobil sonacan izləyib və sonda güllələyərək öldürüblər.

İki nəfərin öldüyü silahlı insidentdən sonra iki yaralı İrəvana aparılıb, daha iki nəfərsə hadisə yerindən qaçıb və yolda avtomobil qəzasına düşərək xəsarət alıb. Onlar Qavar xəstəxanasına çatdırılsa da, sonradan orada qətlə yetiriliblər. Belə ki, dəyənək və bıçaqla silahlanmış şəxslər xəstəxanaya soxulub, polis kordonunu da yararaq palataya keçiblər. Oradakı iki yaralı qardaşı öldürərək qaçıblar.

***

Saat 06:28

Ermənistanın Qavar şəhərində silahlı insident zamanı yaralanan iki nəfər qisas məqsədilə xəstəxanada öldürülüb.

APA-nın məlumatına görə, bu barədə "Sputnik Armenia" xəbər verib.

Bundan əvvəl verilən məlumatda bildirilib ki, atışmada 2 nəfər ölüb, 4 nəfər isə yaralanıb. Ehtimal olunur ki, yaralılardan ikisi hadisə yerindən qaçan zaman yol qəzası nəticəsində xəsarət alıb.

İlkin məlumatlara görə, zərərçəkmişlərdən birinin qohumları təhlükəsizliyin aparıldığı xəstəxanaya hücum edib. Onlar dəyənək və bıçaqla silahlanaraq tibb müəssisəsindəki mebelləri məhv edib, polisə müqavimət göstərib və iki yaralı qardaşın yatdığı palataya soxulublar. Daha sonra həmin şəxslər yaralıların boğazını kəsərək hadisə yerindən yoxa çıxıblar.

Faktla bağlı “iki və ya daha çox şəxsin öldürülməsi”, “qanunsuz silah və sursat əldə etmə və saxlama” maddələri ilə cinayət işi başlanıb.